Ўзбекистонда 100 нафар фуқаро ҳажга бепул юборилади
Тошкент, Ўзбекистон (UzDaily.uz) — Ўзбекистон президенти ташаббуси билан мамлакатнинг 100 нафар фуқароси «Президент ҳажи» махсус дастури доирасида бепул асосда ҳаж зиёратига юборилади. Бу ҳақда Ўзбекистон мусулмонлари идораси хабар қилди.
Идора маълум қилишича, гуруҳ таркибига турли соҳалар вакиллари киритилган. Ўзбекистон мусулмонлари идораси раиси биринчи ўринбосари Хомиджон Ишметбеков иштирокчиларни саралаш белгиланган тартибга қатъий риоя қилинган ҳолда амалга оширилганини билдирди.
Идора таъкидлашича, дастур Саудия Арабистонига ҳаж зиёратини амалга ошираётган фуқароларни қўллаб-қувватлаш доирасида амалга оширилмоқда.
Аввалроқ, 2 май куни Тошкентда 2026 йилги ҳаж мавсумида зиёратга йўл олаётган дастлабки гуруҳлар кузатиб қўйилган эди. Тантанали маросим пойтахтдаги «Новза» масжиди ҳудудида бўлиб ўтди.
