Тошкент, Ўзбекистон (UzDaily.uz) — Фармацевтика тармоғини ривожлантириш агентлиги директори Абдулла Азизов ва Хитойнинг "Walvax Biotechnology Co., Ltd." компанияси вакиллари билан учрашув бўлиб ўтди.

"Walvax Biotechnology Co., Ltd." 2001 йилда ташкил этилган бўлиб, юқори сифатли вакциналарни яратиш, ривожлантириш ва ишлаб чиқаришга ихтисослашган етакчи биофармацевтика компаниядир. "Walvax" томонидан PCV13, HPV2 ва менингококк вакциналари каби 9 та лицензияланган вакцина ишлаб чиқилган, ва 4 та ишлаб чиқариш маркази орқали йилига тахминан 390 миллион доза вакцина тайёрлаш қувватига эга. Компания маҳсулотлари Хитойнинг 31 та вилоятига тарқатилган ва 18 та давлатга экспорт қилинади.

"Walvax" Ўзбекистон билан ҳамкорликда вакциналарини маҳаллий ишлаб чиқаришни йўлга қўйишни таклиф этмоқда. Компаниянинг технологияларни трансфер қилишдаги тажрибаси маҳаллий вакциналарни ишлаб чиқариш салоҳиятини ривожлантириш ва узлуксиз таъминотни таъминлашга хизмат қилади. Ушбу ҳамкорлик Ўзбекистоннинг Миллий эмлаш дастури (NIP) учун вакциналарни етказиб бериш, шунингдек, Марказий Осиё ва МДҲ мамлакатлари учун вакциналар билан қамров ҳудудини кенгайтириш имконини беради.

Агентлик директори Абдулла Азизов Ўзбекистоннинг "Walvax" каби етакчи компаниялар билан ҳамкорлик алоқаларини мустаҳкамлаш муҳимлигини таъкидлаб, мамлакатимизда фармацевтика тармоғини ривожлантиришга қаратилган ташаббусларни қўллаб-қувватлашга тайёрлигини билдирди.

Учрашув якунида томонлар маълумот алмашиш ва ўзаро манфаатли ҳамкорликни ривожлантириш бўйича келишиб олдилар.