Тошкент, Ўзбекистон (UzDaily.uz) — Ўзбекистон ва Корея Республикаси меҳнат муҳожирлари учун виза расмийлаштириш тартибларини соддалаштириш масаласини муҳокама қилмоқда.

17 апрель куни Ўзбекистон Ташқи ишлар вазирининг ўринбосари Олимжон Абдуллаев Корея Республикасининг элчиси Вон До Ён билан учрашув ўтказди. Учрашувда меҳнат миграцияси соҳасидаги икки томонлама ҳамкорликни ривожлантириш масалалари муҳокама қилинди.

Томонлар Жанубий Корея меҳнат бозори учун малакали мутахассислар тайёрлаш, қўшма таълим дастурларини ривожлантириш ва Ўзбекистон фуқаролари учун сафар олди тайёргарлиги бўйича янги ташаббусларни жорий этиш масалаларини атрофлича кўриб чиқдилар.

Алоҳида эътибор меҳнат муҳожирлари, жумладан, мавсумий ишчилар учун визаларни расмийлаштиришни енгиллаштириш, улар учун қулай шарт-шароитлар яратиш масалаларига қаратилди.

Учрашув якунида Ўзбекистон фуқароларининг Жанубий Кореяда бўлиб туришлари ва меҳнат фаолиятини амалга ошириш шартларини яхшилашга қаратилган қўшма ишлар давом эттирилиши бўйича келишувга эришилди.