Тошкент, Ўзбекистон (UzDaily.uz) — Ўзбекистон ва Қишлоқ хўжалигини ривожлантириш халқаро жамғармаси (IFAD) қишлоқ хўжалиги соҳасидаги ҳамкорликни кенгайтириш, жумладан, сунъий интеллектни жорий этиш, механизацияни ривожлантириш ва дронлардан фойдаланиш бўйича келишувга эришди.
Ушбу йўналишлар Ўзбекистон қишлоқ хўжалиги вазири Иброҳим Абдураҳмоновнинг Италияга ташрифи доирасида муҳокама қилинди. Вазир Бутунжаҳон озиқ-овқат форумида иштирок этиш учун мамлакатга борган. Учрашувда IFAD вице-президенти Д. Браун ва ташкилотнинг Ўзбекистондаги вакили Т. А. Монем ҳам қатнашди. Бу ҳақда Ўзбекистон ҳукумати матбуот хизмати хабар берди.
Томонлар Ўзбекистонда аграр ислоҳотларнинг бориши, шунингдек, «Агробизнес учун самарали ечимлар: юқори даромад, инвестициялар ва барқарорлик» лойиҳасининг амалга оширилиши ҳамда уни ривожлантириш истиқболларини кўриб чиқди.
IFAD вице-президенти Ўзбекистоннинг минтақада озиқ-овқат хавфсизлигини таъминлаш ва қишлоқ хўжалигини ривожлантиришдаги ролини таъкидлади. У, шунингдек, ташкилотнинг Марказий Осиёдаги ягона офиси Тошкент шаҳрида жойлашганини маълум қилди.
Музокаралар якунида томонлар 2026–2028 йилларга мўлжалланган грант лойиҳалари доирасида ҳамкорликни давом эттириш бўйича келишувларга эришди.
Устувор йўналишлар қаторига қишлоқ хўжалигида сунъий интеллект технологияларини жорий этиш, соҳани механизациялаш ва учувчисиз технологиялардан фойдаланиш кўламини кенгайтириш киритилди.
Шунингдек, томонлар Ўзбекистон аграр секторини ривожлантиришга қаратилган қўшма лойиҳаларни давом эттиришга келишиб олди.
