Тошкент, Ўзбекистон (UzDaily.uz) — Туркиянинг Aksa Enerji компанияси бир ҳафта ичида Ўзбекистоннинг Тошкент, Жиззах ва Сирдарё вилоятларидаги электр тармоқларини бошқаришни унга топшириш бўйича келишувларни имзолашни режалаштирмоқда. Бу ҳақда компания кузатув кенгаши раиси Жемил Казанжи 16 октябрь куни Президент Шавкат Мирзиёев билан учрашувдан сўнг маълум қилди.
Казанжининг сўзларига кўра, компания Самарқанд вилояти электр тармоқларини бошқариш соҳасида бошлаган фаолиятини Ўзбекистонда кенгайтиришни ният қилмоқда.
Янги лойиҳаларнинг асосий мақсади тақсимлаш инфратузилмасини модернизация қилиш, электр энергияси йўқотишларини камайтириш ва унинг таннархини пасайтиришдан иборат.
Мирзиёев билан учрашувда томонлар ҳамкорликни кенгайтириш ва Aksa Enerji компаниясининг энергетика соҳасини технологик янгилашдаги иштироки масалаларини муҳокама қилдилар.
Музокаралар якунида муайян лойиҳалар устидаги ишларни жадаллаштириш бўйича келишувга эришилди.
Казанжининг таъкидлашича, компания таклиф этилган ташаббусларни ўрганиб чиқади ва ўз таклифларини тақдим этади. Унинг сўзларига кўра, Aksa Enerji жорий ташрифни аниқ келишувларни имзолаш билан якунлашни режалаштирмоқда.
Компания Ўзбекистонда умумий қиймати 750 миллион доллар бўлган тўртта электр станциясини қурган. Энди у электр энергияси ва газни тақсимлашни ҳам ўз фаолиятига киритиш орқали маҳаллий бозордаги иштирокини кенгайтиришни режалаштирмоқда.
Aksa Enerji компаниясининг ҳудудий электр тармоқларини бошқариш бўйича биринчи лойиҳаси Самарқанд вилоятида амалга оширилмоқда. 2025 йил ноябрь ойида Иқтисодиёт ва молия вазирлиги компания ушбу инфратузилмани бошқариш бўйича халқаро тендер ғолиби бўлганини маълум қилган эди. Лойиҳа 30 йиллик муддатга мўлжалланган давлат-хусусий шериклик модели асосида амалга оширилмоқда.
Аввал эълон қилинган режаларга кўра, Aksa Enerji Самарқанд вилояти электр тармоқларини модернизация қилишга 1 миллиард долларгача инвестиция киритишни ният қилган.
Бунда хусусий шерик лойиҳанинг дастлабки ўн йили давомида камида 350 миллион доллар, электр тармоқлари унга топширилганидан кейинги дастлабки икки йилда эса камида 27 миллион доллар сармоя киритиши керак. Шунингдек, у электр энергияси йўқотишларини камайтиришни таъминлаши лозим.
Айни пайтда электр тармоқлари давлат мулки бўлиб қолади. Хусусий шерикка активларга эгалик қилиш ҳуқуқи эмас, балки келишув доирасида инфратузилмани бошқариш ва модернизация қилиш вазифалари топширилади.
