Тошкент, Ўзбекистон (UzDaily.uz) — Тошкент шаҳрида Енгил саноатни ривожлантириш агентлиги тизимига кирадиган давлат Халқаро мода академияси ташкил этилади. Ўзбекистон Президенти янги олий таълим муассасасини ташкил этиш тўғрисидаги қарорни 2026 йил 16 октябрда имзолади (ПҚ-378-сон).
Академия Тошкент тўқимачилик ва енгил саноат институти ҳамда Париж халқаро мода академиясининг қўшма таълим дастури негизида ташкил этилади. Ҳозирда мазкур дастур бўйича таҳсил олаётган барча талабалар янги олий таълим муассасасида ўқишни давом эттирадилар ва ўқишни тамомлаганларидан сўнг Академия дипломини оладилар.
Таълим жараёни 2026/2027 ўқув йилидан бошланади. Талабаларни қабул қилиш амалдаги қонунчиликка мувофиқ, белгиланган умумий тартибда амалга оширилади.
Қўшма таълим дастуридан ташқари, Академияга бакалавриат ва магистратура таълим дастурлари бўйича мутахассисларни мустақил тайёрлаш ҳуқуқи ҳам берилади.
2027/2028 ўқув йилидан бошлаб олий таълим муассасасида дуал таълим шаклини жорий этиш режалаштирилган. У тўқимачилик, тикувчилик, трикотаж ҳамда чарм-пойабзал саноати корхоналари ва ташкилотларининг буюртмалари асосида мутахассислар тайёрлашга йўналтирилади.
Бундан ташқари, Академия негизида давлат буюртмаси бўйича турли ташкилотлар ва хизматлар учун кийим-кечак дизайнини ишлаб чиқиш йўлга қўйилади.
Миллий брендларни шакллантириш ҳам Академия фаолиятининг муҳим йўналишларидан бири бўлади.
Енгил саноат учун кадрлар тайёрлайдиган техникумларнинг битирувчилари 2027/2028 ўқув йилидан бошлаб бакалавриатнинг учинчи курсига қабул қилиниши мумкин. Бунинг учун улар ўқишни муваффақиятли тамомлаган ва Академия томонидан белгиланган энг кам ўртача балл талабига жавоб берган бўлишлари керак.
Таълимни давом эттириш тўлов-контракт асосида амалга оширилади.
Қарорда, шунингдек, Академиянинг хорижий мутахассислари, маъмурий ходимлари, уларнинг оила аъзолари ва хорижий талабалар учун белгиланган тартибда кўп марталик визалар расмийлаштириш ҳамда турган жойи бўйича рўйхатдан ўтказиш чоралари назарда тутилган.
Зарур ҳолларда Академиянинг мурожаатлари асосида визалар ва рўйхатдан ўтказиш муддатлари узайтирилади.
Янги олий таълим муассасаси талабалари учун 400 ўринли талабалар турар жойи қурилади. Объектни давлат-хусусий шериклик асосида барпо этиш ва 2028 йил охирига қадар фойдаланишга топшириш режалаштирилган.
Қурилиш ишлари якунлангунга қадар Тошкент тўқимачилик ва енгил саноат институтидан Академияга ўтказилган талабалар белгиланган тартибда Институтнинг талабалар турар жойидан фойдаланишлари мумкин.
