Тошкент, Ўзбекистон (UzDaily.uz) — Ўзбекистон Савдо-саноат палатасида Марказий Осиё мамлакатлари ва Грузия билан савдо-иқтисодий ҳамкорликни кенгайтириш, шунингдек, 2026 йил 29 ноябрь — 1 декабрь ва 4–5 декабрь кунлари Тошкентда бўлиб ўтадиган «Янги Ўзбекистон — глобал савдо йўллари чорраҳаси» халқаро бизнес-форумига тайёргарлик кўриш масалалари муҳокама қилинди.
Учрашувда Палата раисининг маслаҳатчиси Алишер Шайхов, Грузиянинг Ўзбекистондаги Фавқулодда ва мухтор вакили Иракли Кванчахадзе, шунингдек, Марказий Осиё мамлакатлари ва Грузиянинг савдо-иқтисодий масалалар бўйича маслаҳатчилари ҳамда вакиллари иштирок этди.
Иштирокчилар саноат кооперацияси, қўшма ишлаб чиқариш лойиҳаларини амалга ошириш, инвестицияларни жалб қилиш, технологиялар ва тажриба алмашиш истиқболларини кўриб чиқдилар. Тадбиркорларнинг учинчи мамлакатлар бозорларига биргаликда чиқиш имкониятларига алоҳида эътибор қаратилди.
Бўлажак форум самарадорлигини ошириш мақсадида томонлар иштирокчи компанияларни олдиндан саралаш ва тадбиркорлар ўртасидаги ҳамкорликнинг аниқ йўналишларини белгилаш зарурлигини таъкидладилар. Шунингдек, тадбир якунлари бўйича эришилган келишувларнинг бажарилишини назорат қилиш муҳимлиги қайд этилди.
Учрашув якунида иштирокчилар форумга тайёргарлик жараёнини мувофиқлаштириш, савдо-саноат палаталари ўртасидаги ҳамкорликни давом эттириш ва Ўзбекистон ҳамда минтақа мамлакатлари тадбиркорлари ўртасидаги ишбилармонлик алоқаларини мустаҳкамлашга келишиб олдилар.
