Ўзбекистон 2029 йилгача фискал сиёсатнинг асосий мақсадларини белгилади

Тошкент, Ўзбекистон (UzDaily.uz) — Ўзбекистон 2027–2029 йилларга мўлжалланган Фискал стратегияга мувофиқ солиқ-бюджет сиёсатининг ўрта муддатли асосий йўналишларини белгилади.

Ҳужжатда иқтисодий ўсиш суръатларини йилига тахминан 7 фоиз даражасида сақлаб туриш, 2027 йилдан бошлаб инфляцияни 5 фоизлик мақсадли кўрсаткич доирасида барқарорлаштириш, бюджет тақчиллигини ялпи ички маҳсулотнинг 3 фоизидан оширмаслик ҳамда давлат қарзини ялпи ички маҳсулотнинг 40 фоизидан юқори бўлмаган даражада ушлаб туриш назарда тутилган.

Миллий прогнозларга кўра, ялпи ички маҳсулот ўсиши 2026 йилда 8,1 фоизни, 2027 йилда 6,9 фоизни, 2028 йилда 7,1 фоизни ва 2029 йилда 7,4 фоизни ташкил этади. Асосий ўсиш омиллари сифатида 6,7–7,9 фоизга ўсиши кутилган саноат ҳамда йиллик 14,3–15 фоиз суръатларда ривожланиши прогноз қилинаётган бозор хизматлари қайд этилган. Қишлоқ хўжалигида эса тахминан 5 фоизлик ўсиш кутилмоқда.

Стратегия «Ўзбекистон–2030» стратегиясига мувофиқ 2030 йилга бориб мамлакат иқтисодиёти ҳажмини 240 млрд доллардан ортиқ даражага етказиш мақсади билан уйғунлаштирилган.

Бунинг учун барқарор иқтисодий ўсиш манбаларини шакллантириш, хусусий инвестициялар ва экспортни кенгайтириш, шунингдек, мамлакатнинг суверен кредит рейтингини инвестиция даражасигача ошириш ҳамда Ўзбекистонни ўртача даромаддан юқори даромадли давлатлар гуруҳига киритиш кўзда тутилган.

Ҳужжатда Халқаро валюта жамғармасининг апрель ойидаги прогнозига ҳам таянилган. Унга кўра, жаҳон иқтисодиёти ўсиши 2025 йилдаги 3,4 фоиздан 2026 йилда 3,1 фоизгача секинлашади, глобал инфляция эса 4,1 фоиздан 4,4 фоизгача ошади. Шу билан бирга, ташқи ноаниқликларга қарамай, мамлакат ичидаги юқори иқтисодий фаоллик ўсишнинг юқори суръатларини сақлаб қолиш учун асос сифатида баҳоланмоқда.

Сиёсатнинг асосий йўналишлари сифатида солиқ маъмуриятчилигини такомиллаштириш, яширин иқтисодиётни қисқартириш ва самарасиз имтиёзларни бекор қилиш ҳисобига бюджет даромадлари базасини кенгайтириш, бюджет харажатларидан манзилли фойдаланиш ҳамда фискал қоидаларга қатъий риоя қилиш белгиланган.

Бюджет ташкилотлари ходимларининг иш ҳақи, пенсиялар ва нафақалар инфляция даражасидан кам бўлмаган суръатларда ошириб борилади.