Мирзиёев Ўзбекистон халқини Қурбон ҳайити билан табриклади

Тошкент, Ўзбекистон (UzDaily.uz) — Ўзбекистон Президенти Шавкат Мирзиёев 26 май куни республика халқини Қурбон ҳайити билан табриклади.

Давлат раҳбари тинчлик, эзгулик ва бағрикенглик байрами бўлган Ийд ал-Адҳани муқаддас диннинг моҳиятини акс эттирувчи ва унинг олижаноб ғояларининг ёрқин ифодаси деб атади. Президент таъкидлашича, мазкур қадриятлар бугунги кунда Ўзбекистонда инсон манфаатлари йўлида амалга оширилаётган кенг кўламли ислоҳотлар мазмунига ҳамоҳангдир.

Президент Қурбон ҳайитининг эзгу анъаналари кўп миллатли мамлакатда тинчлик ва осойишталик, дўстлик ва ҳамжиҳатлик муҳитини мустаҳкамлаш, кекса авлод, аёллар ва ёшларни, ёрдамга муҳтож барча инсонларни қўллаб-қувватлаш ҳамда маҳаллаларни ободонлаштириш ишларида куч ва илҳом манбаи бўлиб хизмат қилаётганини қайд этди.

Мирзиёев сўнгги йилларда халқнинг қадимий тарихи ва бой маданияти, буюк аллома ва мутафаккирлар мероси ҳамда ислом динининг ҳақиқий инсонпарварлик моҳиятини ўрганиш ва тарғиб қилиш ишлари янги босқичга кўтарилганини таъкидлади.

Президент бунинг ёрқин тасдиғи сифатида яқинда мамлакат аҳолиси ва хорижий меҳмонлар учун ўз эшикларини очган пойтахтдаги Ислом цивилизацияси маркази, Самарқанддаги Имом Бухорий ёдгорлик мажмуаси ҳамда Марғилондаги Бурҳониддин Марғиноний илмий-маърифий ва туристик мажмуасини келтирди. Уларни Янги Ўзбекистоннинг ноёб дурдоналари сифатида эътироф этди.

Давлат раҳбари Янги Ўзбекистонни барпо этиш йўлидаги бундай муҳим тарихий қадамлар ушбу йўлдан янада ишонч билан боришга руҳлантиришини билдирди.

Президент мамлакатда виждон эркинлиги ва эътиқод ҳуқуқини таъминлаш учун яратилган шароитлар туфайли ушбу муборак кунларда 15 мингдан ортиқ ватандош муқаддас ҳаж зиёратини адо этаётганини таъкидлади. Мирзиёевнинг маълум қилишича, жорий йилда илк бор «Президент ҳожилари» дастури амалга оширилмоқда. Унга мувофиқ, Ватан ва халқ равнақи йўлида фидокорона меҳнат қилган 100 нафар юртдош — уламолар, оқсоқоллар, маҳалла фахрийлари ва уларнинг оила аъзолари муқаддас ҳаж сафарига юборилди.

Давлат раҳбари барча зиёратчиларни Қурбон ҳайити билан табриклаб, Яратгандан уларнинг дуоларини қабул қилишини сўради.

Президент ҳожилар ҳаждан қайтгач, оила, маҳалла ва бутун жамиятда олиб борилаётган маънавий-маърифий ишларида янада фаол иштирок этишига умид билдирди.

Мирзиёев шунингдек, бошқа давлатлардаги мусулмон дўстлар ва ҳамкорларни ҳам самимий табриклаб, уларга тинчлик, тараққиёт ва фаровонлик тилади.

Президент байрам кунлари меҳнат қилаётган ва Ватан сарҳадларини ҳимоя қилиб, ўз бурчини масъулият билан бажараётган фуқароларга алоҳида миннатдорлик билдирди. Давлат раҳбари хорижда ўқиётган ва меҳнат қилаётган ватандошларни ҳам чин дилдан табриклаб, уларга эзгу тилакларини изҳор этди.

Мирзиёев халқ ушбу муқаддас байрамни тинчлик, осойишталик ва ҳамжиҳатлик муҳитида кутиб олаётгани учун Яратганга шукроналар айтиб, Ватан доимо унинг паноҳида бўлишини тилади.