Тошкент, Ўзбекистон (UzDaily.uz) — Наманган вилояти Косонсой тумани ҳокимининг ўринбосари 65 миллион сўм миқдорида пора олишда гумонланиб ушланди. Бу ҳақда Ўзбекистон Давлат хавфсизлик хизмати матбуот хизмати хабар берди.
Идора маълумотларига кўра, мансабдор тадбиркордан унинг уйига қуввати 20 кВт бўлган қуёш панелларини ўрнатиб беришни талаб қилган.
Акс ҳолда, тадбиркор ижарага олган ер майдонини бошқа бир тадбиркорга олиб бериш билан таҳдид қилган.
Гумонланувчи пулни хизмат автомашинасида олаётган вақтда тезкор тадбир давомида қўлга олинган. ДХХ маълумотига кўра, маблағ қуёш панелларини сотиб олиш ва ўрнатиш учун мўлжалланган.
Мансабдорга нисбатан Ўзбекистон Жиноят кодексининг пора олиш учун жавобгарликни назарда тутувчи 210-моддаси бўйича жиноят иши қўзғатилган.
Тезкор тадбир Давлат хавфсизлик хизмати ходимлари томонидан Бош прокуратура ҳузуридаги Иқтисодий жиноятларга қарши курашиш департаменти билан ҳамкорликда ўтказилган.
Иш ҳолатлари аниқланмоқда.
