Тошкент, Ўзбекистон (UzDaily.uz) — Ўзбекистоннинг Новосибирск шаҳридаги Бош консулхонаси мамлакат фуқаросига бир ёшу бир ойлик фарзанди билан қайта бирлашишда ёрдам берди. Бола маҳаллий гўдаклар уйида бўлган. Бу ҳақда «Дунё» ахборот агентлиги хабар берди.
Мавжуд маълумотларга кўра, боланинг онаси Россия миграция қонунчилигини бузгани сабабли Новосибирскдаги хорижий фуқароларни вақтинча сақлаш марказига жойлаштирилган.
Бош консулхона ходимлари бир кун давомида марказ ва гўдаклар уйи раҳбарияти билан музокаралар олиб борди.
Натижада фуқаро озод қилинди, унинг Ўзбекистонга қайтиши учун эса шошилинч тартибда сертификат расмийлаштирилди.
Шундан сўнг бола Толмачёво халқаро аэропортига олиб келинди ва у ерда онаси билан учрашди.
Бош консулхона маълум қилишича, сўнгги етти кун ичида дипломатик ваколатхона яна бир ёшдан 12 ёшгача бўлган беш нафар боланинг Ўзбекистонга қайтарилишини ташкил этган.
Улар орасида ногиронлиги бўлган болалар ҳам бор.
