Марказий банк қарз олувчиларни кредит хавфидан огоҳлантиришни таклиф қилди

Тошкент, Ўзбекистон (UzDaily.uz) — Ўзбекистон Марказий банки банкларни кредит расмийлаштириш жараёнида қарз олувчиларни юзага келиши мумкин бўлган молиявий хавфлар ҳақида огоҳлантиришга мажбурлашни таклиф қилмоқда. Тегишли ўзгартишлар лойиҳаси жамоатчилик муҳокамаси учун эълон қилинди.

Лойиҳага кўра, кредит маҳсулотлари рекламасида кредит бўйича мажбуриятларни бажармаслик молиявий хавфларга олиб келиши мумкинлиги ҳақида огоҳлантириш жойлаштирилиши керак. Ушбу огоҳлантириш учун реклама майдони ёки эфир вақтининг камида 10 фоизини ажратиш таклиф этилмоқда.

Кредит шартномалари учун ҳам алоҳида талаб белгиланмоқда: огоҳлантириш ҳужжатнинг биринчи қисми асосий майдонининг камида 30 фоизини эгаллаши керак.

Огоҳлантириш матнида кредитни ўз вақтида тўламаслик қарз миқдорининг ошиши, мажбурий ундириш чораларининг қўлланилиши, мол-мулкка ундирув қаратилиши ва банк ҳисобварақларидаги пул маблағларининг хатланишига олиб келиши мумкинлиги кўрсатилиши режалаштирилмоқда. Бундан ташқари, тўловни кечиктириш қарз олувчининг кредит тарихига салбий таъсир кўрсатиши мумкин.

Лойиҳада, шунингдек, таклиф этилаётган кредит маҳсулоти истеъмолчиларни чалғитувчи деб топилган тақдирда, банк учун айрим молиявий операцияларни амалга оширишни ёки инфратузилмани кенгайтиришни олти ойгача муддатга чеклаш ёки тақиқлаш имконияти назарда тутилмоқда.

Таклиф этилаётган ўзгартишлар ҳозирча кучга кирмаган ва жамоатчилик муҳокамасига қўйилган.