Тошкент, Ўзбекистон (UzDaily.uz) — Россия ҳукумати раисининг биринчи ўринбосари Денис Мантуров Ўзбекистонга ташрифи доирасида мамлакат раҳбарияти билан учрашувлар ўтказиб, савдо-иқтисодий алоқаларни ривожлантириш ва қўшма лойиҳаларни амалга ошириш масалаларини муҳокама қилди.
Ўзбекистон Президенти Шавкат Мирзиёев билан учрашувда томонлар ўзаро товар айирбошлаш динамикасини сақлаб қолиш ва иқтисодиётнинг устувор тармоқларида кооперация лойиҳаларини илгари суриш учун мувофиқлаштирилган ҳаракатларни амалга ошириш зарурлигини таъкидлади. Бу ҳақда Россия ҳукумати материалларида хабар берилди.
Учрашувда саноат зоналари доирасида қўшма лойиҳаларни амалга ошириш, таълим ва илм-фан соҳаларидаги ҳамкорлик, шунингдек, икки мамлакат ҳудудлари ва бизнес вакиллари ўртасидаги алоқаларни кенгайтиришга алоҳида эътибор қаратилди.
Ўзбекистон Бош вазири Абдулла Арипов билан суҳбатда Денис Мантуров икки давлат ўртасидаги савдо-иқтисодий ҳамкорликни янада ривожлантиришнинг асосий йўналишларини муҳокама қилди.
Россия бош вазири ўринбосари Ўзбекистон Бош вазирининг ўринбосари Жамшид Ходжаев билан биргаликда Янги Тошкент қурилиши лойиҳаси билан танишди.
Россия делегациясига шаҳарнинг бош режаси, айни пайтда олиб борилаётган қурилиш ишларининг бориши, транспорт ва муҳандислик инфратузилмасини ривожлантириш, шунингдек, ҳудудни келгусида ривожлантириш режалари ҳақида маълумот берилди.
Ташриф доирасида Н.Э. Бауман номидаги Москва давлат техника университети ректори Михаил Гордин Тошкентда университет филиали кампусини ташкил этиш лойиҳасини тақдим этди ва уни ривожлантириш режалари ҳақида сўзлаб берди.
Кампуснинг дастлабки иккита ўқув биносини қуришни 2028 йилда якунлаш режалаштирилган. Мажмуа фойдаланишга топширилганидан сўнг филиал 2 минг нафаргача талабани қабул қилиши мумкин.
Кейинчалик бу ерда бакалавриат дастурлари бўйича 11 та таълим йўналишини йўлга қўйиш режалаштирилган.
