Тошкент, Ўзбекистон (UzDaily.uz) — Ўзбекистонлик гроссмейстер Жавоҳир Синдаров АҚШнинг Сент-Луис шаҳрида бўлиб ўтган халқаро Clutch Chess: Champions Showdown турнири ғолиби бўлди. Мусобақа якунида у 20,5 очко жамғарди.
Турнирда, шунингдек, 19 очко тўплаган ҳиндистонлик гроссмейстер Рамешбабу Прагнанандҳа, 16,5 очко билан америкалик Фабиано Каруана ва мусобақани 12 очко билан якунлаган унинг ҳамюрти Хикару Накамура иштирок этди.
Уч кун давомида Синдаров жаҳоннинг етакчи гроссмейстерлари билан ғолиблик учун кураш олиб борди. Якунда у энг яқин таъқибчиси — Прагнанандҳадан 1,5 очко олдинда бўлди.
Турнирнинг умумий мукофот жамғармаси 425 минг долларни ташкил этди. Биринчи ўрин учун Синдаров 125 минг доллар мукофот олди. Бундан ташқари, иштирокчиларга айрим партиялардаги ғалабалар учун қўшимча пул мукофотлари, чемпион учун эса джекпот ҳам белгиланган эди. Қўшимча бонуслар билан бирга Синдаров жами 125 минг доллар ишлаб топди.
Clutch Chess: Champions Showdown турнири Синдаровнинг амалдаги жаҳон чемпиони Гукеш Доммаражуга қарши учрашув олдидан иштирок этган сўнгги мусобақаси бўлди.
