Тошкент, Ўзбекистон (UzDaily.uz) — Истанбулнинг Күчүкчекмедже туманидаги тўйхонада юз берган жанжал оқибатида ҳалок бўлган эркак Ўзбекистон эмас, Туркманистон фуқароси экани маълум бўлди.
Бу ҳақда Ўзбекистоннинг Истанбулдаги Бош консуллиги Туркия оммавий ахборот воситаларида тарқалган маълумотларни текшириш натижалари бўйича хабар берди.
Дипломатик ваколатхона маълумотларига кўра, ҳалок бўлган шахс 33 ёшли Клыч Буриев бўлган. Аввалроқ Истанбулдаги тўйхоналардан бирида содир бўлган муштлашувдан сўнг бир киши вафот этгани ҳақида хабарлар тарқалган ва бу унинг фуқаролиги юзасидан саволлар келтириб чиқарган эди.
Бош консуллик оммавий ахборот воситалари ва ижтимоий тармоқ фойдаланувчиларидан ҳодиса ҳақида материаллар тайёрлаш ва тарқатишда аниқланган ҳолатларни инобатга олишни сўради.
Дипломатик ваколатхона, шунингдек, марҳумнинг оила аъзолари ва яқинларига ҳамдардлик билдирди.
