Тошкент, Ўзбекистон (UzDaily.uz) — «Ипак Йўли» банки кичик ва ўрта бизнесни кредитлаш, аёллар тадбиркорлигини қўллаб-қувватлаш ҳамда экологик лойиҳаларни молиялаштириш учун Австрия ва Европа молия институтларидан 80 миллион доллар олади. Бу ҳақда «Дунё» ахборот агентлиги Австриянинг Extrajournal.Net нашрига таяниб хабар берди.
Битимни ҳуқуқий жиҳатдан қўллаб-қувватлаш ҳақида маблағ ажратишда иштирок этаётган учта молия институтининг етакчи маслаҳатчиси бўлган CMS халқаро юридик фирмаси маълум қилди.
Молиялаштириш иштирокчилари қаторига Австриянинг Oesterreichische Entwicklungsbank AG тараққиёт банки, Италиянинг Cassa Depositi e Prestiti S.p.A. ташкилоти ҳамда Allianz Global Investors бошқарувидаги Allianz Credit Emerging Markets Fund киради.
Нашр маълумотига кўра, ажратиладиган маблағларнинг 35 фоизи аёлларга тегишли корхоналарни молиялаштиришга, яна 30 фоизи эса экологик лойиҳалар ва барқарор ривожланиш билан боғлиқ ташаббусларга йўналтирилиши режалаштирилган.
CMS компаниясининг Венадаги офиси етакчи ҳамкори Марселл Кларкнинг таъкидлашича, мазкур битим халқаро молия институтлари ва инвесторларнинг Ўзбекистон хусусий секторини барқарор ривожлантиришга бўлган қизиқиши ортиб бораётганини акс эттиради.
Маблағларни жалб қилиш ўзбекистонлик корхоналарнинг кредит ресурсларидан фойдаланиш имкониятларини кенгайтириши, аёллар тадбиркорлигининг ривожланишига ёрдам бериши ва бизнесда экологик барқарор ечимларни жорий этишга кўмаклашиши кутилмоқда.
