Гродно ва Андижон 2026–2028 йиллар йўл харитасини имзолади

Тошкент, Ўзбекистон (UzDaily.uz) — Гродно вилояти ижроия қўмитаси раиси Юрий Караев Андижон вилояти ҳокими Шуҳратбек Абдураҳмонов билан ишчи учрашув ўтказди. Андижон вилояти раҳбари Беларусьга ҳудуд расмий делегациясига бошчилик қилиб ташриф буюрди.

Музокаралар Беларусь ва Ўзбекистон III Ҳудудлар форумига тайёргарлик доирасида бўлиб ўтди. Томонлар саноат кооперациясини ривожлантириш, ишбилармонлик алоқаларини кенгайтириш, инвестициявий ҳамкорликни мустаҳкамлаш ҳамда иқтисодиётнинг турли тармоқларида тажриба алмашиш масалаларини муҳокама қилди.

Юрий Караев Ўзбекистон Гродно вилоятининг асосий ташқи иқтисодий ҳамкорларидан бири бўлиб қолаётганини таъкидлади.

Унинг сўзларига кўра, республика Гродно вилояти билан товар айланмаси ҳажми бўйича МДҲ давлатлари орасида учинчи ўринни эгаллайди. 2025 йилда ўзаро савдо ҳажми қарийб бир ярим баробарга ошган, жорий йил бошидан буён эса яна тахминан учдан бир қисмга кўпайган.

Гродно вилояти Ўзбекистонга мол гўшти, сут маҳсулотлари, пишлоқ, болалар озиқ-овқати, ёғочни қайта ишлаш маҳсулотлари, транспорт воситалари ва ускуналар етказиб беради. Ўзбекистондан эса пахта ип-каласи, тўқимачилик маҳсулотлари, янги ва қуритилган мевалар импорт қилинади.

Учрашувда инвестициявий ҳамкорликка алоҳида эътибор қаратилди.

Юрий Караев таъкидлашича, саноат кооперациясининг муваффақиятли намунасидан бири Беларусь капитали иштирокида Андижон вилоятида ташкил этилган «Андижантехмаш» корхонаси ҳисобланади.

Шу билан бирга, Гродно вилояти ҳудудида Ўзбекистон капитали иштирокидаги 51 та ташкилот фаолият юритмоқда. Сўнгги беш йил ичида улар пахта ип-каласи ва металл буюмлар ишлаб чиқариш лойиҳаларига 10 миллион АҚШ долларидан ортиқ инвестиция киритган.

Музокараларнинг алоҳида мавзуларидан бири гуманитар ҳамкорлик бўлди. Қайд этилишича, ҳозирги кунда 235 нафар Ўзбекистон фуқароси Гродно давлат аграр университети ҳамда Янка Купала номидаги Гродно давлат университетида таҳсил олмоқда.

Учрашув якунлари бўйича томонлар Гродно ва Андижон вилоятлари ўртасида 2026–2028 йилларга мўлжалланган ҳамкорликни ривожлантириш бўйича йўл харитасини имзолади.

Ҳужжат саноат, қишлоқ хўжалиги, логистика, туризм ва бошқа йўналишлардаги ҳамкорликни кенгайтиришни назарда тутади.

«Йўл харитаси мазмунли ҳужжат ҳисобланади. Умумий манфаатларимиз саноат, қишлоқ хўжалиги, туризм ва логистика соҳаларини қамраб олади. Ишонаманки, Беларусь ва Ўзбекистон III Ҳудудлар форуми шериклигимизни янада чуқурлаштиришда муҳим босқич бўлади, янги стратегик ташаббусларни ишлаб чиқиш ва ҳудудларимиз манфаати йўлида ҳамкорлик учун қўшимча имкониятларни очиб беради», — деди Юрий Караев.