Ўзбекистонда электромобиллар сони 109 мингдан ошди

Тошкент, Ўзбекистон (UzDaily.uz) — 2026 йил 1 апрель ҳолатига кўра, Ўзбекистон Республикасида рўйхатдан ўтган электромобиллар сони 109,2 мингтани ташкил қилди. Бу ҳақда Миллий статистика қўмитаси маълум қилди.

Тақдим этилган маълумотлар аҳоли орасида электромобилларга қизиқиш юқори эканини кўрсатмоқда. Шу билан бирга, ҳудудлар кесимидаги кўрсаткичлар сезиларли даражада фарқ қилади.

Енгил электр транспортини жорий этиш ва ундан фойдаланиш бўйича мутлақ етакчи Тошкент шаҳри бўлиб қолмоқда. Пойтахтда республикадаги барча электромобилларнинг асосий қисми — 79 минг 851 та электромобиль рўйхатдан ўтган.

Рейтингда иккинчи ўринни Тошкент вилояти эгаллаб турибди. Ҳисобот санаси ҳолатига кўра, ҳудудда 8 минг 194 та экологик тоза автомобиль қайд этилган. Учинчи ўриндан эса Самарқанд вилояти жой олган бўлиб, бу ерда 4 минг 525 та электромобиль рўйхатдан ўтган.

Ўзбекистоннинг бошқа ҳудудларидаги кўрсаткичлар қуйидагича тақсимланган: Хоразм вилоятида 3 минг 42 та, Қашқадарё вилоятида 2 минг 611 та, Фарғона вилоятида 2 минг 231 та, Навоий вилоятида 1 минг 756 та, Бухоро вилоятида 1 минг 685 та ва Андижон вилоятида 1 минг 477 та электромобиль рўйхатга олинган.

Шунингдек, Наманган вилоятида 1 минг 156 та, Қорақалпоғистон Республикасида эса 1 минг 10 та электромобиль мавжуд бўлиб, ушбу ҳудудлар ҳам мингталик маррани ортда қолдирган.

Электромобиллар тарқалиши бўйича энг паст кўрсаткичлар Сирдарё вилоятида 799 та, Жиззах вилоятида 517 та ва Сурхондарё вилоятида 315 та автомобиль билан қайд этилган.