Ўзбекистон фуқаролари Қирғизистонга кўчса, пенсияси сақланади
Тошкент, Ўзбекистон (UzDaily.uz) — Ўзбекистондан Қирғизистонга доимий яшаш учун кўчиб ўтган фуқароларга тайинланган пенсияларни тўлашни давом эттиради.
Бу Ўзбекистон Ҳукумати ва Қирғизистон Вазирлар Маҳкамаси ўртасида 30 июль куни Чўлпон-Ота шаҳрида имзоланган давлат ижтимоий суғуртаси ва пенсия таъминоти тўғрисидаги битимда назарда тутилган. Бу ҳақда Ўзбекистон Пенсия жамғармаси хабар берди.
Янги келишувларга кўра, пенсионернинг Ўзбекистондан Қирғизистонга кўчиб ўтиши энди Ўзбекистон пенсиясини тўлашни тўхтатиш учун асос бўлмайди. Пенсия жамғармаси бўлим бошлиғи Алишер Расуловнинг тушунтиришича, фуқаро Қирғизистонда банк ҳисоб рақамини очиб, уни Ўзбекистонга тақдим этиши мумкин. Шундан сўнг пенсия мазкур ҳисоб рақамига ўтказиб берилади.
Битим, шунингдек, ҳар икки давлатда меҳнат қилган фуқароларни пенсия билан таъминлаш тартибини белгилайди. Томонлар мутаносиблик тамойилини қўллашга келишиб олди. Унга кўра, ҳар бир давлат ўз ҳудудида орттирилган меҳнат стажи ва олинган иш ҳақидан келиб чиқиб, пенсия тайинлайди ва тўлайди.
Шундай қилиб, агар фуқаронинг Ўзбекистон ва Қирғизистонда меҳнат стажи мавжуд бўлса, ҳар бир давлат тегишли иш даври учун пенсия тўловлари бўйича мажбуриятни ўз зиммасига олади. Бунда битим меҳнат стажини ўзаро ҳисобга олишни ҳам назарда тутади.
Янги келишувлар, шунингдек, 1992 йилда Мустақил Давлатлар Ҳамдўстлиги иштирокчи давлатлари фуқароларининг пенсия таъминоти соҳасидаги ҳуқуқларини кафолатлаш тўғрисидаги халқаро битимни қўллаш билан боғлиқ қатор масалаларни ҳал этишга қаратилган. Хусусан, томонлар меҳнат стажини ўзаро ҳисобга олишнинг икки томонлама тартибини белгилади.
Битим Ўзбекистон Президенти Шавкат Мирзиёевнинг Қирғизистонга давлат ташрифи доирасида имзоланди. Қирғизистон Президенти Садир Жапаровнинг таклифига биноан Ўзбекистон раҳбари 30 июль — 1 август кунлари мамлакатда бўлди.
Олий даражадаги музокаралар давомида президентлар дўстлик, яхши қўшничилик ва стратегик шериклик муносабатларини янада мустаҳкамлаш масалаларини муҳокама қилди. Кун тартибидан ўзаро савдони ошириш, саноат кооперациясини кенгайтириш, транспорт боғлиқлигини ривожлантириш ҳамда маданий-гуманитар ҳамкорлик масалалари ҳам ўрин олди.
Битим кучга кириши учун томонлар зарур ички тартиб-таомилларни амалга ошириши ва ҳужжатни ратификация қилиши керак.
Алишер Расуловнинг сўзларига кўра, келгусида Ўзбекистон МДҲ давлатлари ва яқин хориж мамлакатлари, жумладан, Туркия, Озарбайжон, Тожикистон, Қозоғистон ва Туркманистон билан ҳам шунга ўхшаш битимлар тузиш бўйича музокаралар ўтказишни режалаштирмоқда.
