Ўзбекистонда Insurance Broker Consulting суғурта брокерининг лицензияси бекор қилинди

Тошкент, Ўзбекистон (UzDaily.uz) — Ўзбекистонда Insurance Broker Consulting МЧЖнинг суғурта брокери фаолиятини амалга ошириш лицензияси Тошкент туманлараро иқтисодий судининг қарори асосида бекор қилинди.

Ваколатли органлар маълум қилишича, қарор Ўзбекистон Республикасининг «Лицензиялаш, рухсат бериш ва хабардор қилиш тартиб-таомиллари тўғрисида»ги Қонунининг 33-моддаси, шунингдек Вазирлар Маҳкамасининг 2022 йил 21 февралдаги 80-сонли «Махсус электрон тизим орқали айрим фаолият турларини лицензиялаш тартиби тўғрисидаги ягона низомни тасдиқлаш ҳақида»ги қарорининг 51-бандига мувофиқ қабул қилинган.

2013 йил 1 февралда компанияга берилган СФ №00185 серияли лицензия бекор қилинди. Қарор 2026 йил 26 июнь кунидан кучга кирди.

Шу билан бирга, Insurance Broker Consulting МЧЖ қонунчиликда белгиланган тартибда суғурта қилдирувчилар билан тузилган шартномалар, шунингдек суғурта ва қайта суғурталашнинг барча турлари бўйича воситачилик фаолияти доирасида расмийлаштирилган шартномалар юзасидан зиммасига олган барча мажбуриятларни бажариши шарт.