Тошкент, Ўзбекистон (UzDaily.uz) — Фарғона вилоятида 350 миллион доллар тўғридан-тўғри инвестиция жалб этган ҳолда 500 МВт қувватли қуёш электр станциясини қуриш режалаштирилмоқда. Бу ҳақда Ўзбекистон Энергетика вазирлиги хабар берди.
Лойиҳани ривожлантириш тўғрисидаги келишувни Ўзбекистон Энергетика вазирлиги, Инвестициялар, саноат ва савдо вазирлиги, Уммоннинг Voltamp Energy SAOG компанияси ҳамда маҳаллий UET Construction компанияси имзолади.
Ҳужжатда лойиҳани ҳамкорликда ишлаб чиқиш ва уни амалга оширишга тайёргарлик кўриш назарда тутилган.
Электр станцияси ишга туширилганидан сўнг, қайта тикланувчи энергия манбалари ҳисобига йилига 1 миллиард кВт·соат электр энергияси ишлаб чиқарилиши кутилмоқда. Лойиҳа иштирокчиларининг баҳолашича, бу ҳар йили 250 миллион куб метр табиий газни тежаш имконини беради.
Айни пайтда Voltamp Energy мутахассислари қурилиш учун ажратилган майдонни ўрганмоқда ва лойиҳанинг молиявий моделини ишлаб чиқмоқда. Ушбу ишлар якунланганидан сўнг компания тижорат таклифини тақдим этишни режалаштирмоқда.
Қуёш электр станциясидан ташқари, Voltamp компаниясининг Texnokabel Group билан трансформаторлар учун махсус ўтказгичлар ишлаб чиқаришни ташкил этиш бўйича ҳамкорлиги юзасидан келишувларга эришилди.
Шунингдек, Nura Group билан ҳамкорликда Тошкент вилоятининг Оҳангарон туманида юқори кучланишли трансформаторлар ишлаб чиқарувчи завод қуриш режалаштирилмоқда.
Ушбу ташаббусларни амалга ошириш қайта тикланувчи энергетикани ривожлантириш, электротехника маҳсулотлари ишлаб чиқаришни маҳаллийлаштириш ва замонавий технологияларни жорий этишга қаратилган. Лойиҳалар янги иш ўринларини ҳам яратиши кутилмоқда.