Тошкент, Ўзбекистон (UzDaily.uz) — Фарғона вилояти Германиянинг GLOTECH GmbH компанияси билан энергияни тежаш, ишлаб чиқариш жараёнларини рақамлаштириш ва энергия самарадорлигини ошириш соҳаларидаги ҳамкорликни кенгайтиришни режалаштирмоқда.
Ушбу масалаларни вилоят ҳокими Хайрулло Бозоров компаниянинг директорлар кенгаши аъзоси Евгений Суперфин бошчилигидаги делегация билан муҳокама қилди. Бу ҳақда Фарғона вилояти ҳокимлиги хабар берди.
Учрашув иштирокчилари GLOTECH мутахассислари томонидан вилоятда ўтказилган тадқиқотлар ва асбоблар ёрдамида амалга оширилган диагностика натижаларини, шунингдек, корхоналарда энергия сарфини камайтириш имкониятларини кўриб чиқдилар.
Ишлаб чиқариш ускуналарини диагностика қилиш учун рақамли ечимларни жорий этиш ва онлайн мониторинг тизимларини йўлга қўйиш масалаларига алоҳида эътибор қаратилди.
Компания вакиллари дастурий таъминот ишлаб чиқиш, телекоммуникация тармоқларини лойиҳалаш ва интеграция қилиш, шунингдек, IT-инфратузилмани яратиш борасидаги тажрибалари ҳақида ҳам маълумот бердилар.
Музокара иштирокчиларининг баҳолашича, бундай ечимларни саноат корхоналари ва қишлоқ хўжалигида, жумладан, сув насослари ҳамда совитиш ускуналаридан фойдаланиш жараёнларида қўллаш иқтисодий самарадорликни ошириши мумкин.
Учрашув давомида энергия тежовчи технологияларни жорий этишга қаратилган лойиҳаларга инвестицияларни жалб қилиш имкониятлари ҳам муҳокама қилинди.
Томонлар GLOTECH Energy қўшма корхонаси давлат рўйхатидан ўтгани ва амалий фаолиятини бошлаганини таъкидладилар.
Музокаралар якунларига кўра, ҳамкорликни босқичма-босқич ривожлантириш, рақамли ечимлардан фойдаланиш кўламини кенгайтириш ва вилоятда энергия самарадорлигини ошириш технологияларини жорий этиш бўйича келишувга эришилди.
