Тошкент, Ўзбекистон (UzDaily.uz) — БМТнинг Озиқ-овқат ва қишлоқ хўжалиги ташкилоти (ФАО) Тошкент давлат аграр университети билан ҳамкорликда Фарғона водийсида фермерлар учун учта дала мактабини ташкил этди.
Ташаббус Ўзбекистон, Қирғизистон ва Тожикистон ҳудудларини бирлаштирувчи қишлоқ хўжалигини барқарор ривожлантириш бўйича минтақавий лойиҳа доирасида амалга оширилмоқда.
Мактаблар Андижон вилоятининг Қўрғонтепа тумани, Наманган вилоятининг Наманган тумани ва Фарғона вилоятининг Фарғона туманида фаолият юритмоқда.
Ҳар бир мактаб ҳудуднинг қишлоқ хўжалиги йўналишига мувофиқ ихтисослашган. Андижон вилоятида фермерлар картошка етиштиришни, Наманганда ресурсларни тежовчи иссиқхона хўжалигини, Фарғонада эса малина етиштиришни ўрганмоқда.
Ўқитиш шакли анъанавий маъруза курсларидан фарқ қилади: иштирокчилар мавсум давомида экинларни кузатиб боради, мутахассислар билан биргаликда юзага келаётган муаммоларни таҳлил қилади ва турли ечимларни ўз хўжаликларида синаб кўради. «Бу ерда фермер шунчаки тингловчи эмас, балки ўқув жараёнининг фаол иштирокчисига айланади», — деди лойиҳа координатори Муҳаммаджон Қосимов.
Қўрғонтепа туманидаги машғулотларда картошкани озиқлантириш ва парваришлаш, тупроққа ишлов бериш, шунингдек, касалликлар ва зараркунандалардан интеграциялашган ҳимоя қилиш масалалари қамраб олинди.
Наманганда иссиқхоналарни экишга тайёрлаш, ҳарорат ва намликни назорат қилиш, сув ҳамда ўғитлардан оқилона фойдаланиш масалалари ўрганилди.
Фарғона туманида фермерлар малина етиштириш агротехникасини ўзлаштирди. Бунда ўсимликларнинг озуқа моддаларига бўлган эҳтиёжини аниқлашдан тортиб, зараркунандаларга қарши биологик ва кимёвий ҳимоя усулларигача бўлган жараёнлар қамраб олинди.
Ўқитиш «уруғдан уруғгача» тамойили асосида ташкил этилган бўлиб, бутун вегетация даври давомида олиб борилади. Бу фермерлар, олимлар ва агрономлар ўртасида тажриба алмашиш учун доимий майдон яратади. Тўпланган амалий тажрибаларни водийнинг бошқа туманларида ҳам тарқатиш режалаштирилмоқда.
