Ўзбекистон ва Хитой мош экспортини олти корхонага қайта тиклашни муҳокама қилди

Тошкент, Ўзбекистон (UzDaily.uz) — Ўзбекистон ва Хитой экспорт партияарида зараркунанда аниқлангани сабабли фаолияти вақтинча тўхтатилган олтита ўзбек корхонаси томонидан мош экспортини қайта тиклаш масаласини муҳокама қилди.

Учрашув Ўзбекистон Озиқ-овқат хавфсизлиги қўмитаси раисининг ўринбосари Жамшид Урунов ва Хитой Бош божхона бошқармаси вакиллари ўртасида бўлиб ўтди.

Чекловларга олтита ўзбек корхонаси томонидан экспорт қилинган 21 та мош партиясида тўрт нуқтали мош қўнғизи (Callosobruchus maculatus) аниқлангани сабаб бўлган. 1 сентябрдан мазкур компаниялар томонидан мош экспорти вақтинча тўхтатилган.

Учрашувда томонлар ўсимликлар карантини ва фитосанитария соҳасидаги ҳамкорлик, Ўзбекистон қишлоқ хўжалиги маҳсулотларини Хитой бозорига барқарор етказиб бериш ҳамда экспорт жараёнида фитосанитария талабларига риоя қилиш масалаларини муҳокама қилди.

Озиқ-овқат хавфсизлиги қўмитаси мутахассисларидан иборат ишчи гуруҳлар корхоналарда бутун технологик жараённи — мошни қабул қилиш, саралаш ва сақлашдан тортиб, уни фумигация қилиш, лаборатория таҳлили ва контейнерларга юклашгача бўлган босқичларни текширди.

Аниқланган камчиликларни бартараф этиш ва маҳсулотни етиштиришдан тортиб экспортгача бўлган барча босқичларда унинг кузатувчанлигини таъминлаш мақсадида корхоналар қатор амалий чораларни кўрди. Жумладан, герметик фумигация камералари қурилди, омборхоналар алоҳида функционал зоналарга ажратилди, санитария ва лаборатория назорати кучайтирилди.

Хитой томонига корхоналар томонидан белгиланган талаблар тўлиқ бажарилгани ҳақида маълумот тақдим этилди.

Бундан ташқари, томонлар мош, ловия, нўхат, қуруқ мевалар, ширинмия, ўрик данаги ва ерёнғоқ экспорт қилувчи янги корхоналарни Хитой Бош божхона бошқармасининг махсус реестрига киритишни тезлаштириш масаласини муҳокама қилди.

Ўзбекистон ва Хитой ўртасидаги фитосанитария соҳасидаги ҳамкорлик ҳукуматлараро келишув ва амалдаги 18 та протокол асосида амалга оширилади.

2026 йилда Ўзбекистон яна 10 турдаги маҳсулот учун фитосанитария рухсатномаларини олди. Натижада эндиликда фитосанитар сертификатлар асосида Хитой бозорига 38 турдаги маҳсулотни экспорт қилиш мумкин.