Эрон АҚШга Ҳурмуз бўғозини очиш шартларини маълум қилди

Тошкент, Ўзбекистон (UzDaily.uz) — Эрон АҚШга воситачилар орқали Ҳурмуз бўғозини очиш учун бажарилиши зарур бўлган шартларни етказди. Бу ҳақда республика Хавфсизлик кенгаши котиби Муҳсин Резоий маълум қилди. Бу ҳақда Press TV хабар берди.

Резоийнинг сўзларига кўра, Теҳрон Вашингтондан урушни якунлаш, Эроннинг музлатилган активларини қайтариш, шунингдек, бутун минтақада, жумладан, Ливан ва Ғазо секторида ҳарбий ҳаракатларни тўхтатишни талаб қилмоқда.

Эрон Хавфсизлик кенгаши котиби АҚШ ўз сиёсатини ўзгартириб, Теҳрон таклифларини қабул қилмагунча, бўғоз очилмаслигини билдирди.

Аввалроқ Эрон парламенти Миллий хавфсизлик қўмитаси Ҳурмуз бўғози орқали кемалар ҳаракатини тартибга солишни назарда тутувчи янги қонун лойиҳасини маъқуллаган эди. Жумладан, ҳужжатда АҚШ ва Исроил кемаларининг бўғоз орқали ўтиши тақиқланиши кўзда тутилган.

Хабарда келтирилган маълумотларга кўра, июнь ойи ўртасида Вашингтон ва Теҳрон тинчлик келишувини тузиш жараёнини бошлаши керак бўлган меморандумни имзолаган. Бироқ уч ҳафта ўтиб, томонлар яна можарони кескинлаштиришга ўтган.

Август ойи бошида Дональд Трамп кутилayotgan келишув муносабати билан Эронга қарши навбатдаги ҳужумлар тўлқини бекор қилинганини маълум қилди.

Шунингдек, у Ҳурмуз бўғози яқин вақт ичида очилиши кераклигини билдириб, бу шарт бажарилмаса, ҳужумларни қайта бошлаш билан таҳдид қилди.