Тошкент, Ўзбекистон (UzDaily.uz) — АҚШ президенти Дональд Трамп Ўзбекистонга ташриф буюриш ниятида. Бу ҳақда АҚШ президентининг глобал ҳамкорлик бўйича махсус вакили Паоло Замполли «Ўзбекистон 24» телеканалининг «Таҳлилнома» дастурига берган интервьюсида маълум қилди.
Замполлининг сўзларига кўра, Трамп шахсан унга Ўзбекистонга ташриф буюриш истаги борлигини айтган.
«Унинг Ўзбекистонга келишни хоҳлаётганини биламан. Президентнинг иш жадвали жуда зич. Аммо у менга Ўзбекистонга ташриф буюриш нияти ҳақида айтган», — деди махсус вакил.
Замполли эҳтимолий ташрифни ташкил этиш устида ишлаётганини маълум қилди ва у яқин вақт ичида амалга ошишига умид билдирди. Шу билан бирга, ташрифнинг аниқ муддатлари ҳозирча айтилмаган.
Аввалроқ, 7 август куни Ўзбекистон президенти Шавкат Мирзиёев Дональд Трамп билан телефон орқали мулоқот ўтказган эди. Суҳбат давомида Ўзбекистон раҳбари АҚШ президентини Ўзбекистонга ташриф буюришга таклиф қилган.
