Ўзбекистон

Тошкентда товламачиликда гумонланаётган гуруҳ қўлга олинди

Тошкентда товламачиликда гумонланаётган гуруҳ қўлга олинди
Тошкентда товламачиликда гумонланаётган гуруҳ қўлга олинди / Фото: Видеодан олинган кадр.

Тошкент, Ўзбекистон (UzDaily.uz) — Тошкент шаҳрида товламачилик, зўравонлик ишлатиш ва безориликда гумонланаётган уюшган жиноий гуруҳнинг тўрт нафар аъзоси қўлга олинди. Бу ҳақда Ўзбекистон Республикаси Ички ишлар вазирлиги матбуот хизмати хабар берди.

Вазирлик маълумотларига кўра, гуруҳнинг тахмин қилинаётган етакчиси У. А. («Доля») ҳамда унинг шериклари И. Ю. («Скар»), Р. З. («Туз») ва Д. А. («Доди») ушланган.

Ички ишлар вазирлиги хабар беришича, қўлга олинганларнинг уч нафари аввал ҳам жиноий жавобгарликка тортилган. Жумладан, «Доля» Жиноят кодексининг 169-моддаси, «Скар» 168-моддаси, «Туз» эса 169, 226 ва 277-моддалари бўйича судланган.

Ҳуқуқни муҳофаза қилувчи органлар талқинига кўра, 2026 йил сентябрь ойида икки таниш ўзаро қарз битими бўйича келишиб олган. Улардан бири тадбиркорлик фаолияти билан шуғулланиш учун иккинчисига бир йил муддатга 11 минг АҚШ доллари берган.

Ноябрь ойида гуруҳ аъзолари ушбу келишувдан хабар топиб, икки эркак ўртасидаги муносабатларга аралашган. ИИВ маълум қилишича, уларнинг бундай аралашуви учун қонуний асослар бўлмаган. Шунга қарамай, гуруҳ аъзолари куч ишлатиб, қарз олган шахсни қўрқитган ва шундан сўнг унинг танишига тегишли пулни эгаллаб олган.

Гумонланувчилар қўлга киритган 11 минг АҚШ долларини эгасига қайтармаган, балки ўзлаштириб, шахсий эҳтиёжлари учун сарфлаб юборган.

Қўлга олинган шахсларга нисбатан Ўзбекистон Республикаси Жиноят кодексининг 165-моддаси 2-қисми (товламачилик) билан жиноят иши қўзғатилган.

ИИВ ушбу гуруҳ аъзоларининг хатти-ҳаракатларидан жабр кўрган фуқароларни ички ишлар органларига мурожаат қилишга чақирди.

 

Дилафруз Ниязова
Дилафруз Ниязова

Дилафруз Ниязова 2025 йилдан буён UzDaily жамоасида фаолият юритиб, нашрнинг ўзбек тилидаги версияси учун масъулдир.