Тошкент, Ўзбекистон (UzDaily.uz) — Давлат активларини бошқариш агентлиги аввал оммавий эълон билан бирга кузатилмаган Paynet тўлов ташкилотининг хусусийлаштирилиши юзасидан илк бор изоҳ берди. Бу ҳақда 8 октябрь куни бўлиб ўтган матбуот анжуманида ДХА директори Соҳибжон Муродов маълум қилди.
Муродовнинг сўзларига кўра, Paynet хусусийлаштирилишида қонунчиликда тўғридан-тўғри назарда тутилган усул қўлланилган. Гап жамият иштирокчиларининг улушни сотиб олишдаги имтиёзли ҳуқуқи ҳақида бормоқда.
Давлат активларини бошқариш агентлиги раҳбари «Масъулияти чекланган жамиятлар тўғрисида»ги қонунга мувофиқ, агар жамият иштирокчиларидан бири ўзига тегишли улушни сотмоқчи бўлса, уни биринчи навбатда жамиятнинг бошқа иштирокчиларига ёки жамиятнинг ўзига таклиф қилиши кераклигини тушунтирди.
Муродов, шунингдек, жамиятнинг устав капиталидаги улушни сотиб олиш бўйича имтиёзли ҳуқуқдан фойдаланилганда ахборотни ошкор қилиш борасида Давлат активларини бошқариш агентлиги ёндашуви ўзгарганини маълум қилди. Унинг айтишича, келгусида агентлик бундай битимлар ҳақида жамоатчиликни хабардор қилиб боришни режалаштирмоқда.
Paynet эгаси қандай ўзгарган?
2024 йил апрель ойида Paynet тўлов сервисини бошқарувчи Uzpaynet компаниясининг таъсисчиси ўзгарди.
Реестр маълумотларига кўра, компаниянинг 100 фоиз улуши New Industrial Technologies компаниясига ўтган. Давлат улушининг сотилгани ҳақида расман хабар берилмаган, гарчи аввалроқ ижтимоий тармоқларда компания эгаси ўзгаргани ҳақида маълумотлар тарқалган бўлса-да.
New Industrial Technologies компанияси 2019 йилда ташкил этилган. Унинг устав фонди 273,56 миллиард сўмни ташкил этади. Компаниянинг 60 фоиз улуши Алекс Лига, қолган 40 фоизи эса унинг раҳбари ҳам ҳисобланган Мустафо Абдураҳмоновга тегишли.
Абдураҳмонов Asia Alliance Bank’нинг йирик акциядори бўлган Asia Alliance Group компаниясининг 77,6 фоиз улушига эгалик қилади.
Аввалроқ давлат Uzpaynet’ни хусусийлаштиришга уриниб кўрган эди. 2022 йил август ойида Давлат активларини бошқариш агентлиги компаниядаги давлатга тегишли 100 фоиз улушни сотиш ҳақида эълон берган.
Кейинги ой давомида эҳтимолий харидорлардан еттита ариза келиб тушган, бироқ таклифларни қабул қилиш жараёни «қўшимча аниқлик киритиш» учун кечиктирилган.
