Банк назорати қўмитаси июнда 21 банкни жаримага тортди

Тошкент, Ўзбекистон (UzDaily.uz) — Ўзбекистон Марказий банки ҳузуридаги Банк назорати қўмитаси 2026 йил июнь ойида еттита йиғилиш ўтказиб, уларда 34 та масалани кўриб чиқди ҳамда тегишли қарорлар қабул қилди.

Кун тартибидаги масалаларнинг асосий қисми — 22 таси рўйхатдан ўтказиш ва лицензиялаш билан боғлиқ бўлди. Қўмита олтита кредит ташкилотининг уставларига киритилган ўзгаришларни рўйхатдан ўтказди, банкларда текширув ўтказиш учун аудиторларга учта малака сертификатини бериш масаласини кўриб чиқди, микромолия ташкилотларини рўйхатдан ўтказиш ва тўртта мурожаат бўйича тўлов ташкилотларини лицензиялаш, кредит ташкилотлари устав капиталидаги улушларни сотиб олиш учун бешта рухсатнома бериш, шунингдек, тижорат банклари кузатув кенгашлари, бошқарувлари аъзолари ҳамда бошқа муҳим лавозимларга номзод бўлган тўрт нафар шахс номзодини келишиш масалаларини кўриб чиқди.

Яна 12 та масала кредит ва тўлов ташкилотларининг молиявий ҳолатига бағишланди. Қўмита Марказий банк кўрсатмаларининг ҳамда пруденциал нормативларнинг бажарилиши, банклар ва нобанк кредит ташкилотларида ўтказилган инспекция текширувлари натижалари, шунингдек, тақсимланмаган фойдани тақсимлаш масалаларини муҳокама қилди.

Кўриб чиқилган материаллар якунларига кўра, пруденциал нормативларга риоя этмагани ва ўз фаолиятини қонунчилик талабларига мувофиқлаштирмагани учун 23 та банкка таъсир чоралари ва санкциялар қўлланилиши мумкинлиги ҳақида огоҳлантириш берилди.

Бундан ташқари, қонунчилик талаблари бузилгани, шунингдек, инспекция текширувлари ва ўрганишлар давомида аниқланган камчиликлар учун 21 та банк, битта микромолия ташкилоти ва битта тўлов ташкилотига нисбатан жарима санкциялари қўлланилди.