Тошкент, Ўзбекистон (UzDaily.uz) — 15 сентябрь куни Пусан шаҳрида Жаҳон халқаро молия марказлари альянси (WAIFC) Кенгаши Тошкент халқаро молия марказини ташкилотнинг тўлақонли аъзоси сифатида қабул қилди. Бу ҳақда Тошкент халқаро молия маркази хабар берди.
WAIFC Лондон, Франкфурт, Люксембург, Дубай, Гонконг, Пусан ва Остона каби етакчи молия марказларини бирлаштиради.
Тошкент 2022 йилдан буён Альянс фаолиятида иштирок этиб келмоқда ва аввал кузатувчи мақомига эга эди.
Тўлақонли аъзолик молиявий тартибга солиш, инвесторлар ҳуқуқларини ҳимоя қилиш ва замонавий молиявий инструментларни ривожлантириш соҳасидаги халқаро амалиётлардан фойдаланиш имконини беради. Бундан ташқари, Тошкент халқаро молия маркази WAIFCнинг қўшма тадқиқотлари ва экспертлик дастурларида иштирок этиши мумкин.
Тошкент халқаро молия маркази учун Альянсга аъзолик унинг расмий ишга туширилишидан олдинги биринчи халқаро эътироф бўлди.
WAIFCга қўшилиш Ўзбекистоннинг янги молиявий платформасига бўлган ишончни мустаҳкамлаш ва уни глобал молия ҳамжамиятига янада интеграция қилишга ҳам қаратилган.
