Toshkent, O’zbekiston (UzDaily.uz) — Yaponiya Bosh vazirining maxsus maslahatchisi Yosimasa Uno va O‘zbekiston iqtisodiyot va moliya vazirining birinchi o‘rinbosari Ilhom Norqulov 6 oktyabr kuni ikki tomonlama hamkorlikni kengaytirish istiqbollarini muhokama qildi.
Uchrashuv savdo-iqtisodiy, infratuzilmaviy va innovatsion yo‘nalishlar, shuningdek, hamkorlikning yangi sohalariga bag‘ishlandi. Bu haqda O‘zbekiston Respublikasi Iqtisodiyot va moliya vazirligi xabar berdi.
Muzokaralarda Yaponiyaning O‘zbekistondagi Favqulodda va Muxtor Elchisi Kenji Xirata hamda boshqa masʼul vakillar ishtirok etdi.
Tomonlar o‘zaro manfaatli hamkorlikni yana-da rivojlantirish masalalarini ko‘rib chiqib, amaliy hamkorlikning yangi yo‘nalishlarini muhokama qildi.
2025 yil dekabr oyida bo‘lib o‘tgan birinchi «Markaziy Osiyo + Yaponiya» sammitida ilgari surilgan tashabbuslarni amalga oshirish, shuningdek, yuqori darajadagi tashrif yakunlari bo‘yicha erishilgan kelishuvlarga alohida eʼtibor qaratildi.
Yaponiya tomoni «Erkin va ochiq Hind-Tinch okeani mintaqasi» (FOIP) konsepsiyasi haqida maʼlumot taqdim etdi. Mazkur konsepsiya Yaponiya tomonidan 2016 yilda ilgari surilgan bo‘lib, 2026 yil may oyida Yaponiya Bosh vaziri Sanae Takaiti uning yangilangan versiyasi — FOIP 3.0 ni taqdim etdi.
Yangilangan konsepsiyaning ustuvor yo‘nalishlari qatorida sunʼiy intellekt davri iqtisodiy infratuzilmasini rivojlantirish, energiya va muhim xomashyo taʼminoti zanjirlarining barqarorligini taʼminlash, davlat-xususiy sheriklik hamda xavfsizlik sohasidagi hamkorlik belgilangan.
Uchrashuv davomida “yashil” energetika, energiya samaradorligini oshirish va suv tejovchi texnologiyalarni joriy etish sohalaridagi loyihalarni amalga oshirish istiqbollari ham ko‘rib chiqildi.
Muzokaralar yakunlari bo‘yicha tomonlar o‘zaro manfaatdorlik uyg‘otuvchi ustuvor yo‘nalishlar bo‘yicha hamkorlikni izchil rivojlantirish va O‘zbekiston hamda Yaponiya o‘rtasidagi amaliy aloqalarni kengaytirishga tayyor ekanini tasdiqladi.
