O‘zbekiston Soliq qo‘mitasi XVJ bilan islohotlarni muhokama qildi
Toshkent, O’zbekiston (UzDaily.uz) — O‘zbekiston Soliq qo‘mitasi Xalqaro valyuta jamg‘armasi missiyasi bilan videomaslahatlashuv o‘tkazdi. Unda Iqtisodiyot va moliya vazirligi hamda Biznes-ombudsman apparati vakillari ham ishtirok etdi. Tomonlar tadbirkorlarni qo‘llab-quvvatlash choralari va soliq maʼmuriyatchiligini yana-da takomillashtirish masalalarini muhokama qildi. Bu haqda O‘zbekiston Respublikasi Soliq qo‘mitasi xabar berdi.
Uchrashuvning asosiy mavzularidan biri kichik biznes subyektlarini davlat tomonidan qo‘llab-quvvatlash choralari bo‘ldi. Ishtirokchilar soliq tekshiruvlarini o‘tkazishga vaqtinchalik moratoriy joriy etish, shuningdek, o‘rta va yirik soliq to‘lovchilar uchun profilaktik yoki muqobil audit mexanizmini joriy qilish masalalarini ko‘rib chiqdi.
O‘zbekiston vakillari tadbirkorlarga maʼmuriy yuklamani kamaytirish biznesning norasmiy sektordan chiqishi, soliq bazasining kengayishi va tadbirkorlik faolligining oshishiga xizmat qilishi kerakligini taʼkidladi.
Ayni paytda XVJ ekspertlari soliq nazoratining samarali vositalarini saqlab qolish bilan birga, halol faoliyat yuritayotgan korxonalarga tushadigan yuklamani kamaytirish zarurligini taʼkidladi. Muhokama yakunlari bo‘yicha tomonlar tadbirkorlikni qo‘llab-quvvatlash va byudjet tushumlarining barqarorligini taʼminlash o‘rtasidagi muvozanatni umumiy ustuvor vazifa sifatida belgiladi.
O‘zbekistonda biznesni qo‘llab-quvvatlash choralari bilan bir qatorda fiskal barqarorlikni saqlashga qaratilgan kompleks chora-tadbirlar ham amalga oshirilmoqda. Jumladan, auditorlik tashkilotlari reyestri shakllantirilmoqda va profilaktik auditning yagona standartlari ishlab chiqilmoqda.
Bundan tashqari, elektron monitoring tizimi yaratilmoqda va suiisteʼmollarning oldini olish bo‘yicha ishlar kuchaytirilmoqda. Qabul qilinayotgan qarorlarning oqibatlari doimiy ravishda kuzatib borilishi rejalashtirilgan.
Tomonlar bo‘lib o‘tgan muloqotni konstruktiv deb baholadi va hamkorlikni davom ettirish niyatini tasdiqladi. Keyingi hamkorlik, xususan, O‘zbekistonda soliq maʼmuriyatchiligi tizimini takomillashtirishga qaratilgan bo‘ladi.
