Toşkent, Özbekiston (UzDaily.uz) — “Navoiyuran” davlat korxonasi va Yaponiyaning Marubeni Corporation kompaniyasi uran qazib olish jarayonlariga raqamli texnologiyalar hamda sunʼiy intellekt asosidagi yechimlarni joriy etish imkoniyatlarini muhokama qildi. Kompaniyalar vakillarining ishchi onlayn uchrashuvi 2026 yil 2 noyabr kuni bo‘lib o‘tdi. Bu haqda “Navoiyuran” davlat korxonasi matbuot xizmati xabar berdi.
Muzokaralarda Marubeni tarkibidagi raqamli va texnologik yechimlar ishlab chiqishga ixtisoslashgan Dolbix Consulting bo‘linmasi ham ishtirok etdi.
Tomonlar asosiy eʼtiborni zamonaviy texnologiyalarni qo‘llash orqali ishlab chiqarish samaradorligini oshirish imkoniyatlariga qaratdi. Xususan, ishlab chiqarish jarayonlarini optimallashtirish, texnologik uskunalardan foydalanishni takomillashtirish, quduqlarni raqamlashtirish va mahsuldor eritmalarni qayta ishlashni avtomatlashtirish masalalari muhokama qilindi.
Uchrashuv ishtirokchilari sanoat mahsulotlari ishlab chiqarishda ilg‘or texnologik yechimlardan foydalanish istiqbollarini ham ko‘rib chiqdi.
Muzokaralar yakunida tomonlar hamkorlikning istiqbolli yo‘nalishlarini belgilab oldi va birgalikdagi ishlarni davom ettirishga kelishib oldi.
Muhokama “Navoiyuran” ishlab chiqarish jarayonlarini takomillashtirishga qaratilgan texnologik yechimlarni izlash doirasida o‘tkazildi. Ayni paytda korxona xabarida aniq loyihalar, ularni amalga oshirish muddatlari va ehtimoliy investitsiyalar hajmiga oid maʼlumotlar keltirilmagan.
