Toshkent, O’zbekiston (UzDaily.uz) — O‘zbekistonlik tennischi Aleksandra Barmicheva Istanbul shahrida o‘tkazilgan ITF World Tennis Tour Juniors musobaqasining J200 toifasidagi turniri g‘olibiga aylandi.
Musobaqa davomida Barmicheva bir qator muhim g‘alabalarni qo‘lga kiritdi. Chorak finalda u turnirning birinchi raqamli saralangan tennischisi, ITF jahon o‘smirlar reytingida 83-o‘rinni egallab turgan turkiyalik Ayshe Balni mag‘lub etdi.
Uchrashuv 3:6, 6:3, 6:4 hisobida o‘zbekistonlik tennischi foydasiga yakunlandi.
Turnir boshlanishidan oldin Barmicheva ITF jahon o‘smirlar reytingida 278-o‘rinni egallab turgan edi.
J200 toifasidagi turnirdagi g‘alaba 200 reyting ochkosini beradi.
Bu O‘zbekiston vakilasiga jahon o‘smirlar reytingi navbatdagi yangilanganidan so‘ng o‘z mavqeini yaxshilash imkonini beradi.
