ЯИДХПда давлат хизматлари учун виртуал тўлов картаси жорий этилади

Тошкент, Ўзбекистон (UzDaily.uz) — Ўзбекистонда Ягона интерактив давлат хизматлари порталида (ЯИДХП) давлат хизматлари учун тўлов қилиш мақсадида виртуал банк картасини бепул очиш имконияти яратилади. Янги функция Президентнинг «Аҳолига кўрсатилаётган давлат хизматларини такомиллаштириш ва фуқаролар учун қўшимча қулайликлар яратиш чора-тадбирлари тўғрисида»ги қарорида назарда тутилган.

Рақамли технологиялар вазирлигига Адлия вазирлиги ва тижорат банклари билан ҳамкорликда ушбу хизматни 1 сентябрга қадар жорий этиш топширилди.

Ҳужжатга мувофиқ, фойдаланувчилар ЯИДХП орқали танланган тижорат банкининг виртуал тўлов картасини очиши ёки мавжуд банк картасини порталга боғлаши мумкин бўлади. Ушбу картадан давлат хизматлари учун тўловларни амалга оширишда фойдаланиш мумкин бўлади.

Қарорда, шунингдек, давлат хизмати асоссиз равишда рад этилганида, уни кўрсатишнинг белгиланган муддатлари бузилганида, шунингдек, ортиқча ёки хатолик билан амалга оширилган тўловлар ҳолатида маблағларни ариза берувчининг банк картасига автоматик тарзда қайтариш тартиби ҳам назарда тутилган.

Бунда банклар виртуал картани очиш, уни тўлдириш ёки ундан маблағларни бошқа банк картасига ўтказиш учун комиссия ундирмайди.

Бундан ташқари, ҳужжатда вояга етмаган фуқароларни ўз ҳуқуқларини мустақил амалга ошириш (эмансипация) масалалари бўйича судга мурожаат қилганда давлат божини тўлашдан озод этиш ҳам назарда тутилган. Адлия вазирлигига Миллий ижтимоий ҳимоя агентлиги ва Болалар омбудсмани билан биргаликда икки ой муддатда тегишли қонун лойиҳасини Ҳукуматга киритиш топширилди.