Ўзбекистон ёшлар терма жамоаси бокс бўйича Осиё чемпионатини муваффақиятли якунлади / Фото: Asian Boxing

 Тошкент, Ўзбекистон (UzDaily.uz) — Ўзбекистон терма жамоаси Жакарта шаҳрида бўлиб ўтган U19 ва U23 ёш тоифалари ўртасидаги бокс бўйича Осиё чемпионатида иштирокини муваффақиятли якунлади. Мусобақанинг сўнгги кунида U23 тоифаси финалларида ўзбекистонлик боксчилар тўртта олтин ва иккита кумуш медални қўлга киритди.

65 кг вазн тоифасида Илҳомжон Эргашев финалда Ҳиндистон вакили Ваншажни 4:1 ҳисобида мағлуб этиб, Осиё чемпиони бўлди.

70 кг вазнда Абдуллоҳ Мадаминов ҳал қилувчи жангда қозоғистонлик Нурбек Мурсални 5:0 ҳисобида ишончли мағлуб этиб, олтин медални қўлга киритди.

Терма жамоага яна бир ғалабани Фазлиддин Эркинбоев тақдим этди. У 80 кг вазн тоифаси финалида Қозоғистон вакили Онер Сеилханни ҳакамларнинг якдил қарори билан 5:0 ҳисобида мағлуб этди.

90 кгдан юқори ўта оғир вазн тоифасида Озодбек Алиев қирғизистонлик Мирзакир Кошалиевга қарши кечган кескин финал баҳсида 3:2 ҳисобида устун келиб, Осиё чемпиони унвонини қўлга киритди.

85 кг вазн тоифасида Норбек Абдуллаев финалда қозоғистонлик Темирлан Мукатаевга 1:4 ҳисобида мағлуб бўлиб, кумуш медалга сазовор бўлди. 90 кг вазнда эса Самир Собиров Қозоғистон вакили Ибрагим Бетаевга 2:3 ҳисобида ютқазиб, кумуш медални қўлга киритди.

55 кг вазн тоифасида Фарёзбек Дусматов бронза медали соҳибига айланди. 60 кг вазнда Абдураҳмон Маҳмуджонов ҳам чемпионатнинг бронза медалини қўлга киритди.

Терма жамоага яна бир бронза медални 75 кг вазн тоифасида учинчи ўринни эгаллаган Абдулазиз Абдулҳамидов тақдим этди.

Мусобақа якунларига кўра, ўзбекистонлик боксчилар ўнта вазн тоифасида 4 та олтин, 2 та кумуш ва 3 та бронза медални қўлга киритиб, якуний медаллар жадвалида биринчи ўринни эгаллади. Иккинчи ўринни Қозоғистон терма жамоаси банд этди.

Турнир якунларига кўра, Ўзбекистон терма жамоаси бокс бўйича Осиё чемпионатида муваффақиятли иштирок этиб, ёшлар тоифасида қитъадаги юқори тайёргарлик даражаси ва етакчилик мавқеини яна бир бор тасдиқлади.