Хитой ва Япония делегациялари Ўзбекистон фармацевтика бозорининг салоҳиятини ўрганиб чиқди

Тошкент, Ўзбекистон (UzDaily.uz) — Фармацевтика тармоғини ривожлантириш агентлигида Golden Concord Holdings (Хитой), Ningbo Green-Health Pharmaceutical (Хитой) ва Phytopharma (Япония) компанияларининг делегацияси билан учрашув бўлиб ўтди.

Учрашувда агентлик директори Абдулла Азизов мамлакат фармацевтика саноатида олиб борилаётган ислоҳотлар, замонавий тенденциялар ва инфратузилма ҳақида маълумот берди.

Хорижий инвесторлар учун яратилаётган қулай имкониятлар, соддалаштирилган тартиблар, солиқ ва божхона имтиёзлари, сармоя киритишнинг ҳуқуқий кафолатлари батафсил тушунтирилди.

Делегация томонидан Ўзбекистоннинг доривор ўсимликлар захиралари бойлиги ва табиий хом ашё салоҳиятидан келиб чиқиб, доривор ўсимликлар асосида тиббий маҳсулотлар ишлаб чиқариш имкониятларига катта қизиқиш билдирилди.

Томонлар фармацевтика соҳасидаги ҳамкорлик истиқболларини муҳокама қилиб, келгусида қўшма ташаббуслар юзасидан мулоқотни давом эттиришга келишиб олдилар.