Тўрткўлда реконструкциядан сўнг вокзал очилди
Тошкент, Ўзбекистон (UzDaily.uz) — Ўзбекистон давлат мустақиллигининг 35 йиллиги арафасида Тўрткўлда реконструкция қилинган темир йўл вокзали фойдаланишга топширилди. Янгиланишдан сўнг йўловчилар учун янги кутиш зали, электрон ахборот таблоси ва бепул Wi-Fi каби замонавий хизмат кўрсатиш шароитлари яратилди. Бу ҳақда «O‘ztemiryo‘lyo‘lovchi» АЖ матбуот хизмати хабар берди.
Тўрткўл темир йўл вокзали 2001 йилда қурилган бўлиб, 2026 йилда тўлиқ реконструкциядан ўтказилди. Таъмирлаш ишлари давомида бинонинг ички ва ташқи қисмлари янгиланди, замонавий кутиш зали жиҳозланди ва янги ўриндиқлар ўрнатилди.
Вокзалда электрон ахборот таблоси ҳам пайдо бўлди. У орқали йўловчилар поездлар ҳаракати ҳақида тезкор маълумот олишлари мумкин. Шунингдек, ташриф буюрувчилар учун бепул Wi-Fi хизмати йўлга қўйилди.
Вокзалда биринчи марта замонавий VIP-зал ҳам ташкил этилди. У поезд кутаётган йўловчилар учун мўлжалланган бўлиб, юқори даражада хизмат кўрсатишни назарда тутади.
Реконструкция жараёнида ногиронлиги бўлган ва имконияти чекланган йўловчилар учун ҳам зарур шароитлар яратилди. Багаж ташиш учун вокзал махсус аравачалар билан жиҳозланди.
Ободонлаштириш ишлари вокзалга туташ ҳудудни ҳам қамраб олди. Ҳудуд кўкаламзорлаштирилди, вокзал ҳудудида чакана савдо шохобчалари, банкомат, алоқа воситалари ва офис хизматлари фаолияти йўлга қўйилди.
Ҳозирда Тўрткўл вокзали Қорақалпоғистон Республикасининг муҳим темир йўл инфратузилмаси объектларидан бири бўлиб қолмоқда. У кунига ўртача 150–200 нафар йўловчига хизмат кўрсатади.
Бир сутка давомида вокзал ўртача тўртта йўловчи поездни қабул қилиб, жўнатади.
Реконструкциядан сўнг вокзал йўловчиларга янада замонавий, хавфсиз ва қулай хизмат кўрсатиш шароитларини таъминлаши кутилмоқда.
