Тошкентда одам савдосига уринишнинг олди олинди

Тошкент, Ўзбекистон (UzDaily.uz) — Тошкент шаҳрида тезкор тадбир давомида Ўзбекистон фуқаросини жинсий эксплуатация мақсадида чет элга олиб чиқишга бўлган уринишнинг олди олинди.

Гумонланувчи жабрланувчини Бирлашган Араб Амирликларига жўнатишга уринган пайтда Тошкент халқаро аэропортида қўлга олинди.

Вилоят ИИББ матбуот хизмати маълумотига кўра, ушланган шахс — Тошкент вилояти Ангрен шаҳрида яшовчи 25 ёшли аёл бўлиб, у Дубай шаҳрида яшовчи шахслар билан тил бириктирган ҳолда ҳаракат қилган. Тергов маълумотларига кўра, у Жиззах вилоятида яшовчи 20 ёшли аёлнинг ишончига кириб, уни алдаш йўли билан чет элга чиқишини ташкил этишга уринган.

Аниқланишича, гумонланувчи жабрланувчини хорижда юқори маошли иш борлигига ишонтирган. Шу билан бирга, Дубайда уни бошқа бир Ўзбекистон фуқароси кутиб олиши режалаштирилган.

Ҳуқуқни муҳофаза қилувчи органлар маълумотига кўра, жабрланувчини Тошкент аэропорти орқали Дубайга жўнатиш жараёнида тезкор тадбир ўтказилиб, уринишга чек қўйилган.

Ушланган шахсга нисбатан Ўзбекистон Республикаси Жиноят кодексининг 135-моддаси 2-қисми «д» ва «к» бандлари («Одам савдоси») бўйича жиноят иши қўзғатилди. Айни пайтда тергов ҳаракатлари олиб борилмоқда.

Ҳуқуқни муҳофаза қилувчи органлар мазкур жиноятга алоқадор бўлган бошқа шахсларни аниқлаш бўйича ҳам чора-тадбирларни амалга оширмоқда.