Ўзбекистонда электромобиллар учун автокредитларни субсидиялаш таклиф этилди

Тошкент, Ўзбекистон (UzDaily.uz) — Ўзбекистонда янги электромобилларни харид қилишда давлат томонидан қўллаб-қувватлаш механизми ишлаб чиқилди. У автокредитларни субсидиялашни назарда тутади. Вазирлар Маҳкамасининг тегишли қарор лойиҳаси жамоатчилик муҳокамасига қўйилди.

Ҳужжатга кўра, 2026 йил 1 августдан бошлаб қиймати 1000 та базавий ҳисоблаш миқдоридан ошмайдиган янги электромобилларни харид қилишда давлат томонидан қўллаб-қувватлаш кўрсатилади. Компенсация татбиқ этиладиган автокредитнинг максимал миқдори 300 млн сўмни ташкил этади.

Давлат кредитлашнинг дастлабки икки йили давомида фоиз ставкасининг бир қисмини қоплашни режалаштирмоқда. Қўллаб-қувватлаш йиллик 16 фоиздан юқори бўлган ставканинг бир қисмига татбиқ этилади, бунда компенсация миқдори 8 фоиз пунктдан ошмайди.

Масалан, кредит йиллик 24 фоиз ставкада расмийлаштирилганда, давлат 8 фоиз пунктни қоплайди, ставка 20 фоиз бўлганда эса компенсация 4 фоиз пунктни ташкил этади.

Дастур фақат янги M1 тоифасидаги, фақат электр энергиясида ҳаракатланадиган ва ички ёнув двигатели билан жиҳозланмаган электромобилларга татбиқ этилади.

Компенсация олиш учун қарз олувчи банк талабларига жавоб бериши, кредитлар бўйича муддати ўтган қарздорлиги бўлмаслиги ва кредит расмийлаштирилаётганда давлат томонидан қўллаб-қувватлашдан фойдаланиш ниятини билдириши керак.

Компенсация маблағлари қарз олувчига эмас, балки кредит бўйича фоизларни қисман қоплаш учун тўғридан-тўғри банкка ўтказилади.

Агар қарз олувчи кетма-кет уч ой давомида кредит бўйича тўловларни амалга оширмаса, кредитни муддатидан олдин тўлиқ тўласа, кредит шартномасини бекор қилса ёки давлат томонидан қўллаб-қувватлашни расмийлаштиришда нотўғри маълумот тақдим этса, компенсация тўлови тўхтатилиши мумкин.

Таклифга кўра, 2026 йилда дастур республика бюджетига қўшимча ажратиладиган маблағлар ҳисобидан молиялаштирилади.

2027–2030 йилларда зарур харажатларни ушбу қўллаб-қувватлаш чорасига бўлган талабни ҳисобга олган ҳолда ҳар йили давлат бюджетига киритиш режалаштирилмоқда.

Айни пайтда қарор лойиҳаси жамоатчилик муҳокамаси босқичида бўлиб, шу сабабли унинг қоидалари якуний қабул қилинишидан олдин ўзгартирилиши мумкин.