Тошкент, Ўзбекистон (UzDaily.uz) — Тошкентнинг бешта туманида яшовчи аҳоли иссиқ сувнинг ранги, ҳиди ва тиниқлиги ўзгарганидан шикоят қилди. Бу ҳолат 2026–2027 йиллар куз-қиш мавсумига тайёргарлик доирасида иссиқлик тармоқларида олиб борилаётган таъмирлаш ва созлаш ишлари билан боғлиқ бўлиши мумкин.
Мутахассисларнинг дастлабки баҳолашига кўра, бунга ишлар якунланганидан кейин қувурларни сув билан қайта тўлдириш сабаб бўлган бўлиши мумкин. Тармоқларни босим остида синаш, айрим участкаларни улаш ва ускуналарни созлаш жараёнида сув айланиши секинлашиши мумкин. Натижада қувурлар ичида тўпланган тузлар ва коррозия заррачалари яна сув оқимига тушади.
Шу сабабли иссиқ сувнинг ранги, ҳиди ва тиниқлиги вақтинча ўзгариши мумкин. Хусусан, аҳоли керосин ёки кимёвий моддаларни эслатувчи ҳид келаётгани ҳақида хабар берган.
Лаборатория текширувлари маълумотларига кўра, сув таркибида аҳоли саломатлигига салбий таъсир кўрсатиши мумкин бўлган моддалар аниқланмаган. Мутахассислар, шунингдек, ғайриоддий ҳиднинг ўзи сувда заҳарли моддалар ёки нефт маҳсулотлари мавжудлигини англатмаслигини таъкидламоқда.
Айни пайтда Тошкентнинг иссиқлик таъминоти тизими штат режимида ишламоқда ва истеъмолчиларга иссиқ сув одатдагидек етказиб берилмоқда. Қиш мавсумига тайёргарлик доирасида режали таъмирлаш ва созлаш ишлари давом этмоқда.
