Тошкент, Ўзбекистон (UzDaily.uz) — Тошкентда 13 сентябрь куни геология, геологик қидирув ва тоғ-кон саноатидаги амалий вазифаларни ҳал этишда сунъий интеллект ва Data Science усулларидан фойдаланишга бағишланган GEOMIN AI Labs 2026 хакатони финали бўлиб ўтди.
Тадбир Ўзбекистон Республикаси Тоғ-кон саноати ва геология вазирлиги ҳамда Қидирув геофизиклари жамияти (SEG) кўмагида GEOMIN 2026 халқаро конференцияси доирасида ташкил этилди. Хакатоннинг технологик ҳамкори сифатида SLB компанияси иштирок этди.
GEOMIN AI Labs 2026 хакатонида иштирок этиш учун Ўзбекистондан қарийб 60 нафар талаба ва ёш мутахассис ариза топширди. Танлов ва ишлаб чиқилган ечимларни баҳолашдан сўнг 10 нафар иштирокчи финалга чиқиб, ўз лойиҳаларини экспертлар ҳаъкамларига тақдим этди.
Хакатон давомида иштирокчилар машинали ўқитиш технологияларидан фойдаланган ҳолда тўртта амалий вазифани ҳал қилди. Улар истиқболли руҳ объектларини аниқлаш, олтин таркибини прогноз қилиш, геотермал энергетика учун ерости ҳароратини баҳолаш, шунингдек, тоғ-кон фаолияти билан боғлиқ экологик хавфларни камайтириш масалаларини қамраб олди.
Финалда иштирокчилар ишлаб чиққан моделлар, тадқиқот натижалари ва уларни амалиётда қўллашнинг эҳтимолий йўналишларини тақдим қилди.
Биринчи ўринни Геология фанлари университетидан Зиёда Минаварова эгаллади. Иккинчи ўрин Олмалиқ шаҳридаги МИСиС университети филиали вакили Диёра Каримовага берилди. Учинчи ўринни Олмалиқ давлат техника институтидан Темирали Садиқов қўлга киритди.
Биринчи ва иккинчи ўринни эгаллаган ғолибларга SLB компаниясида ҳақ тўланадиган стажировкани ўташ ҳамда Data Science, сунъий интеллект ва рақамли технологиялардан фойдаланган ҳолда соҳадаги амалий вазифаларни ҳал этишда иштирок этиш имконияти берилди.
Шунингдек, уч нафар совриндор GEOMIN 2026 халқаро конференциясига билетлар, финал иштирокчилари эса эсдалик совғалари билан тақдирланди.
Ташкилотчилар таъкидлашича, GEOMIN AI Labs 2026 бир майдонда ёш мутахассислар, соҳа вакиллари, академик ҳамжамият ва давлат ташкилотларини бирлаштириб, геология ва тоғ-кон саноатида сунъий интеллект технологияларини амалий қўллаш имкониятларини намойиш этди.
