Тошкентда беш кунга транспорт ҳаракати чекланади

Тошкент, Ўзбекистон (UzDaily.uz) — Тошкент шаҳрида 18–22 июль кунлари D-002 ва D-021 автомобиль йўллари кесишмасида йўл ўтказгич қурилиши, шунингдек, йўл инфратузилмасини реконструкция қилиш ишлари муносабати билан қатор автомобиль йўлларида транспорт ҳаракатига вақтинчалик чекловлар жорий этилади.

Тегишли хизматлар маълум қилишича, Бектемир туманидаги D-012 «Бектемир — Чирчиқ — Чорвоқ» автомобиль йўлининг 6-километрида Ийк-ота мавзеси йўналишида юк автомобиллари ҳаракати чекланади. Айланма йўл сифатида юк автомобилларига «Роҳат» транспорт ечимидан фойдаланиш тавсия этилган.

Бундан ташқари, D-012 автомобиль йўлининг 2-километрида Food City савдо мажмуаси томон барча турдаги транспорт воситалари ҳаракати тўлиқ ёпилади. Айланма ҳаракат Фурқат кўчаси ҳамда Бектемир туманидаги айланма йўл орқали ташкил этилади.

Вақтинчалик чекловлар D-021 автомобиль йўлини ҳам қамраб олади. Унда Янгиҳаёт туманидаги Қипчоқ ва Сурум чорраҳалари оралиғида ҳаракат тўлиқ тўхтатилади.

Шунингдек, Бектемир туманида D-002 автомобиль йўлининг Паркент тракти билан кесишган қисмида ҳам транспорт ҳаракати чекланади.

Ҳайдовчиларга сафар йўналишларини олдиндан режалаштириш, ташкил этилган айланма йўллардан фойдаланиш, вақтинчалик йўл белгилари талабларига ҳамда йўл-патруль хизмати ходимларининг кўрсатмаларига амал қилиш тавсия этилди.