Осиё чемпионати ғолиблари Тошкентда тантанали кутиб олинди

Тошкент, Ўзбекистон (UzDaily.uz) — Жакарта шаҳрида бўлиб ўтган 19 ва 23 ёшгача бўлган спортчилар ўртасидаги бокс бўйича Осиё чемпионатида муваффақиятли иштирок этган Ўзбекистон миллий терма жамоаси Тошкентда тантанали равишда кутиб олинди.

Мусобақада таркиби 38 нафар спортчидан иборат бўлган Ўзбекистон терма жамоаси 21 та олтин, 6 та кумуш ва 6 та бронза медални қўлга киритди. Бу натижа чемпионат рекордига айланди ҳамда Ўзбекистон терма жамоасининг Осиё қитъасидаги етакчилик мавқеини яна бир бор тасдиқлади.

Тантанали кутиб олиш маросими Ислом Каримов номидаги Тошкент халқаро аэропортида бўлиб ўтди. Чемпион ва совриндорларни, шунингдек, уларнинг мураббийлари ҳамда яқинларини табриклаш учун спорт жамоатчилиги ва оммавий ахборот воситалари вакиллари ташриф буюрди.

Тадбирда Ўзбекистон спорт вазири ўринбосари Шаҳрилло Маҳмудов, Мудофаа вазирлиги ҳузуридаги Юқори натижалар спортини ривожлантириш маркази бошлиғи Мансур Мадаминов, Ўзбекистон бокс федерацияси раиси ўринбосари Сакен Полатов ҳамда Ўзбекистон бокс федерацияси бош котиби Шоҳид Тиллабоев иштирок этди.

Маросимда сўзга чиққан спорт ташкилотлари вакиллари спортчилар ва мураббийлар штабини муваффақиятли иштирок билан табриклади. Улар қайд этганидек, эришилган натижа ўзбекистонлик боксчилар тайёргарлигининг юқори даражасини, спорт захирасини тайёрлашнинг амалдаги тизими самарадорлигини ҳамда ёш истеъдодлар билан олиб борилаётган ишларнинг муваффақиятли эканини тасдиқлайди.