Тошкент, Ўзбекистон (UzDaily.uz) — Тошкентда қонунчиликни бузгани учун ушланган транспорт воситаларини етказиб бериш, жойлаштириш ва сақлаш тартиби белгиланди. Тегишли низом 2026 йил 22 сентябрдаги 508-сонли Вазирлар Маҳкамаси қарори билан тасдиқланди.
Ҳужжат ушланган транспорт воситаларини вақтинча сақлаш жойларига кўчириш, шунингдек, уларни жарима майдончаларида жойлаштириш ва сақлаш қоидаларини белгилайди.
Низомга кўра, ваколатли давлат органи автомобильни жарима майдончасига жойлаштириш тўғрисида қарор қабул қилганидан сўнг тегишли маълумот «Жарима майдончаси» модули орқали давлат органлари ҳамда транспорт воситаларини сақлаш хизматларини кўрсатувчи юридик шахсларга юборилади.
Ҳайдовчилик ҳуқуқидан четлаштиришни назарда тутувчи ҳуқуқбузарликларни содир этган шахсларнинг транспорт воситалари жарима майдончасига фақат махсус техника — эвакуатор ёки манипулятор ёрдамида етказилиши мумкин.
Транспорт воситасини ушлаб туришга сабаб бўлган ҳолатлар бартараф этилганидан сўнг транспорт воситасини жарима майдончасидан олиб чиқишга рухсат «Жарима майдончаси» модули орқали расмийлаштирилади. Бундай рухсат маъмурий ишни кўриб чиқувчи орган мансабдор шахслари томонидан берилади.
Рухсат тегишли модуль орқали электрон шаклда расмийлаштирилиши ва QR-код билан тасдиқланиши керак. Бир иш куни ичида у тизим орқали транспорт воситаси ҳайдовчисига ҳамда уни сақлаш хизматини кўрсатувчи юридик шахсга юборилади. Бундан ташқари, ҳайдовчининг телефон рақамига SMS-хабарнома ҳам юборилади.
Ушланган транспорт воситасини «Жарима майдончаси» модули орқали расмийлаштирилмаган рухсатномалар асосида жарима майдончасидан бериш тақиқланади.
