Тошкентда аномал иссиқ туфайли кўчаларни суғориш кучайтирилди

Тошкент, Ўзбекистон (UzDaily.uz) — Тошкент шаҳрида юқори ҳарорат таъсирини камайтириш ва чангланиш даражасини пасайтириш мақсадида шаҳарнинг марказий ҳамда асосий кўчаларини қўшимча суғориш ишлари ташкил этилди.

Шаҳар ҳокимлиги маълум қилишича, ишлар махсус жадвал асосида ҳар куни амалга оширилмоқда ва ҳаво ҳарорати барқарорлашгунга қадар давом эттирилади.

Кўчаларни суғориш ишлари Тошкент шаҳар ҳокимлиги ва Бош ободонлаштириш бошқармаси томонидан Йўл ҳаракати хавфсизлиги бошқармаси кўмагида ташкил этилган. Ишлар автомобиль ва пиёдалар ҳаракати энг кам бўладиган вақтларда бажарилмоқда.

Ташкилотчиларнинг маълум қилишича, бундай жадвал йўл ҳаракати хавфсизлигини таъминлаш, аҳоли учун ноқулайликларни энг кам даражага тушириш ҳамда иссиқ об-ҳаво шароитида шаҳар муҳитида янада қулай шароитларни сақлаб туриш имконини беради.