Тошкент ва Андижанда коррупция билан боғлиқ жиноятлар фош этилди

Тошкент, Ўзбекистон (UzDaily.uz) — Давлат хавфсизлик хизмати ходимлари Иқтисодий жиноятларга қарши курашиш департаменти билан ҳамкорликда Тошкент шаҳри ва Андижон вилоятида коррупция ва фирибгарлик билан боғлиқ икки ҳолатни аниқлади. Ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.

Тошкент шаҳрида тезкор тадбирлар Давлат хавфсизлик хизмати Call-марказига келиб тушган мурожаат асосида ўтказилди. Натижада Яшнобод тумани Кадастр агентлиги бўлимининг бош инспектори воситачи орқали 2 минг АҚШ доллари олган вақтида қўлга олинди.

Тергов маълумотларига кўра, инспектор ўз хизмат мавқеидан фойдаланиб, маҳаллий фуқародан ноқонуний ўрнатилган енгил конструкцияни буздириш чораларини кўрмаслик ва уни жарима кўринишидаги маъмурий жавобгарликка тортмаслик эвазига пул талаб қилган.

Андижон вилоятида эса 1984 йилда туғилган Андижон шаҳри фуқароси мазкур иш бўйича гумонланувчи сифатида кўрилмоқда. Тергов версиясига кўра, у харидорга Андижон туманининг Ҳақон саноат ҳудудида жойлашган ва давлат захирасида бўлган 40 сотих ер участкасини сотиб олишни таклиф қилган.

Гумонланувчи мазкур ер участкасини E-auksion электрон савдо майдончаси орқали қўлга киритганини даъво қилиб, кадастр тизимидаги танишлари ёрдамида уни харидор номига расмийлаштириб беришни ваъда қилган. Бу хизматлари учун у 160 минг АҚШ доллари талаб қилган.

Шахс Давлат хавфсизлик хизмати, ички ишлар органлари ва Иқтисодий жиноятларга қарши курашиш департаменти ходимлари томонидан ўтказилган қўшма тезкор тадбир давомида 80 минг АҚШ доллари миқдоридаги аванс пулларини олаётган вақтида қўлга олинди. Ушбу ҳолат юзасидан ҳам жиноят иши қўзғатилди.