Сергелида 2027 йилда 5,5 кмлик BRT йўли қурилиши режалаштирилган

Тошкент, Ўзбекистон (UzDaily.uz) — Тошкент шаҳрининг Сергели туманида 2027 йилда узунлиги 5,5 километр бўлган алоҳида автобус қатнови йўлаги — BRT тизимини қуришни бошлаш режалаштирилмоқда. Бу ҳақда Ўзбекистон Президенти Шавкат Мирзиёев туманнинг ижтимоий-иқтисодий ривожланишига бағишланган йиғилишда маълум қилди.

Режага кўра, янги йўналиш Янги Сергели кўчаси бўйлаб ўтади ва 2025 йил кузида фойдаланишга топширилган Шота Руставели кўчасидаги BRT коридори билан интеграция қилинади.

Йиғилиш давомида давлат раҳбари Сергели туманининг умумий узунлиги 23 километр бўлган асосий магистрал йўлларида ҳаракат хавфсизлигини ошириш чораларини кўриш бўйича топшириқлар берди. Жумладан, 455 та «ақлли» светофор ўрнатиш, 150 та автобус бекатини модернизация қилиш ва 10 мингта автотураргоҳ ўрни яратиш кўзда тутилган.

Пойтахтнинг жанубий қисми транспорт инфратузилмасини ривожлантириш масалаларига ҳам алоҳида эътибор қаратилди. Президент Тошкент ҳалқа автомобиль йўлида қурилаётган янги йўл ўтказгич барпо этилишини жадаллаштириш зарурлигини таъкидлади. У Сергели, Бектемир ва Янгиҳаёт туманларини шаҳарнинг бошқа ҳудудлари билан янада қулай боғлашга хизмат қилиши лозим.

Шунингдек, йиғилишда хорижий сайёҳлар учун шаҳар навигациясини такомиллаштириш чоралари муҳокама қилинди. Масъул идораларга тарихий обидалар, боғлар, бозорлар, туристик маҳаллалар, кафе ва ресторанлар ўртасида қулай маршрутларни ташкил этиш вазифаси юклатилди.

Бундан ташқари, аэропортлар, темир йўл вокзаллари, автобус бекатлари ва метро станцияларида сайёҳлар учун шаҳар маршрутлари хариталарини ўрнатиш, шунингдек, уларни навигация имкониятларига эга бепул мобил илова билан таъминлаш режалаштирилмоқда.

Жорий йилнинг март ойида Тошкент шаҳар Йўл ҳаракатини ташкил этиш маркази пойтахтда тўртта BRT йўналишини барпо этиш режалари ҳақида маълум қилган эди. Улар қаторига Янги Сергели кўчасидаги маршрут ҳам киритилган. Янги алоҳида автобус йўлакларининг умумий узунлиги 16 километрдан ортиқ бўлиши кутилмоқда.