Ўзбекистон Маданият ва санъатни ривожлантириш жамғармаси Саудия Арабистони билан ҳамкорликни муҳокама қилди

Тошкент, Ўзбекистон (UzDaily.uz) — Ўзбекистон Маданият ва санъатни ривожлантириш жамғармаси делегацияси Саудия Арабистони Подшоҳлиги Оммавий маданий тадбирлар ҳайъатининг сармоя масалалари бўйича мудири Нора Ол-Ғвайз хоним билан учрашув ўтказди.

Учрашув доирасида Саудия Арабистони томони Оммавий маданий тадбирлар ҳайъати фаолиятининг асосий йўналишлари, жумладан, “Риёд фасллари” ва “Булвард Олами” каби энг йирик умуммиллий лойиҳаларни амалга ошириш бўйича тақдимот ўтказди.

Томонлар Саудия Арабистонида Ўзбекистон ҳафталигини ўтказиш, ўзбек театр, опера ва балет жамоаларининг гастролларини ташкил этиш, замонавий санъат ва креатив саноат соҳаларида ҳам қўшма лойиҳаларни амалга ошириш истиқболларини муҳокама қилдилар.

Унда “Боулевард Ворлд” лойиҳасига алоҳида эътибор қаратилди. Томонлар ушбу лойиҳа доирасида Ўзбекистоннинг маданий мероси, ҳунармандчилиги, туризми ва миллий гастрономиясини тарғиб этиш, шунингдек, ундан икки мамлакат ўртасидаги маданий алоқаларни янада мустаҳкамлаш учун доимий майдон сифатида фойдаланиш имкониятларини кўриб чиқдилар.