Тошкент, Ўзбекистон (UzDaily.uz) — Тошкент метрополитенида хавфсизликни таъминлаш бошқармаси ходимлари йўқотилган 10 минг АҚШ долларини топиб, эгасига қайтарди. Бу ҳақда Ўзбекистон Ички ишлар вазирлиги матбуот хизмати хабар берди.
Пуллар Сергелий автомобиль бозорида машина харид қилиш мақсадида Тошкентга келган Қозоғистон фуқаросига тегишли бўлган. Унинг айтишича, у «Олмазор» метро бекатигача етиб борган, бироқ йўлда сумкасидан бир даста пул тушиб кетган. Шошилиб кетаётгани сабабли эркак пуллари йўқолганини пайқамаган ва улар йўқолганини автомобиль бозорига борганидан сўнг аниқлаган.
Йўқолган пулларни ички ишлар органлари ходими топган. Шундан сўнг у ҳамкасблари билан биргаликда видеокузатув камералари ёзувлари орқали пул эгасининг шахсини аниқлади.
Эркак метро бекатига таклиф қилиниб, унга топилган 10 минг АҚШ доллари қайтариб берилди. Қозоғистон фуқароси ички ишлар органлари ходимларига ҳалоллиги ва тезкор иши учун миннатдорлик билдирди.
